ბარსელონა და ატლეტიკო, შესაძლოა, ახალ პირობებზე შეთანხმდნენ

"ბარსელონასა" და "ატლეტიკოს" შორის ანტუან გრიზმანთან დაკავშირებული დავა, შესაძლოა, შეთანხმებით დასრულდეს.

"ატლეტიკოს" არ სურს, "ბარსელონასთან" წინასწარ შეთანხმებული 40 მილიონი ევრო გადაიხადოს, რის გამოც მადრიდელები ანტუანს თითო მატჩში მაქსიმუმ ნახევარ საათს ათამაშებენ. თუ ასე გაგრძელდება, "ატლეტიკოს" სეზონის ბოლოს ანტუანის 40 მილიონ ევროდ გამოსყიდვის ვალდებულება არ ექნება და ფრანგი თავდამსხმელი "ბლაუგრანაში" დაბრუნდება.

"ბარსელონაში" მიაჩნიათ, რომ "ატლეტიკო" შეთანხმებას არღვევს და კატალონიურ კლუბში სამართლებრივი დავის დაწყებას არ გამორიცხავენ, მაგრამ საქმის სასამართლომდე მისვლის შემთხვევაში "ბარსას" მოგება გარანტირებული არ აქვს.

შექმნილ ვითარებაში ზარალდება ყველა: "ატლეტიკო" ვერ იყენებს გუნდის ყველაზე მაღალანაზღაურებად ფეხბურთელს, რომლის შენახვაც წელიწადში 20 მილიონ ევროზე მეტი უჯდება; "ბარსელონა" სეზონის ბოლოს ვერ მიიღებს დაგეგმილ 40 მილიონ ევროს, გარდა ამისა კატალონიურ კლუბს დაუბრუნდება მაღალანაზღაურებადი ფეხბურთელი, რომელიც გუნდს არ ჭირდება და იმის გამო, რომ მას კონტრაქტის ამოწურვამდე ერთი წელი ექნება დარჩენილი, მისი გაყიდვაც გართულდება; თავად ფეხბურთელი სათამაშო დროის გარეშე რჩება; ზარალდება საფრანგეთის ნაკრებიც, რომლის ერთ-ერთი ლიდერიც მსოფლიო ჩემპიონატის წინ სათამაშო პრაქტიკის გარეშეა.

Sport-ის ცნობით კლუბებმა გადაწყვიტეს, ახალ პირობებზე მოილაპარაკონ. საუბარია იმაზე, რომ "ბარსელონა" 40 მილიონის ნაცვლად 25 მილიონ ევროს მიიღებს. მოსალოდნელია, რომ შეთანხმება უახლოეს ორ კვირაში შედგება.

შეთანხმების მიღწევის შემთხვევაში ყველა მხარე მეტნაკლებად კმაყოფილი დარჩება. "ატლეტიკოს" თანხის გადახდა მაინც მოუწევს, მაგრამ არა 40 მილიონის და თანაც გუნდის ერთ-ერთ ლიდერს გამოიყენებს; "ბარსელონა" კი, მართალია, დაგეგმილ თანხას სრულად ვერ მიიღებს, მაგრამ გაცილებით რთულ სიტუაციას აირიდებს თავიდან.