რა მდგომარეობაა წამსვლელ ფეხბურთელებთან დაკავშირებით?

ამჟამად "ბარსელონას" მთავარი საზრუნავი ფეხბურთელების გაშვებაა, რათა კლუბმა ლა ლიგის ფინანსური მოთხოვნები დააკმაყოფილოს და მოთამაშეთა შეძენა/დარეგისტრირება მოახერხოს. 

კატალონიელები შვიდი ფეხბურთელის გაშვებაზე მუშაობენ, თუმცა ნაკლები წარმატებით. 

Mundo Deportivo გვთავაზობს ამ მომენტისთვის არსებულ მდგომარეობას აღნიშნული ფეხბურთელების წასვლასთან დაკავშირებით.

პიერ-ემერიკ ობამეიანგი - "ბარსელონა" ერთ-ერთ პირველ წამსვლელად გაბონელს განიხილავს, რადგან მის სანაცვლოდ სოლიდური თანხის მიღება შეუძლია. კლუბი €30 მილიონს ითხოვს. ობამეიანგით "ჩელსი" და "მანჩესტერ იუნაიტედი" ინტერესდებიან. მიუხედავად იმისა, რომ 33 წლის შემტევს დარჩენა სურს, შესაძლოა მან აზრი შეიცვალოს.

სერჟინიო დესტი - ამერიკელმა უკვე იცის, რომ ის ჩავი ერნანდესის გეგმებში არ შედის, რაც "რაიო ვალიეკანოსთან" განაცხადს მიღმა დატოვებამაც დაადასტურა, თუმცა ახალგაზრდა უკანახაზელს დარჩენა სურს და საკუთარ თავზე მუშაობას განაგრძობს. მიუხედავად ამისა, "ბარსა" დესტის გაშვებასა და ახალი მარჯვენა მცველის მოყვანას ცდილობს. ამერიკელით რამდენიმე გრანდი ინტერესდება.

მემფის დეპაი - ნიდერლანდელის "იუვენტუსში" ტრანსფერი ფაქტობრივად გადაწყვეტილია. სხვა კლუბი არც განიხილება. "ბარსელონა" მას უფასოდ შეელევა.

სამუელ უმტიტი - უმტიტის სურს, საკუთარი შესაძლებლობები კიდევ ერთხელ დაამტკიცოს, რის გამოც ახალ კლუბს ეძებს, თუმცა ჯერ-ჯერობით ტრანსფერის პერსპექტივა ბუნდოვანია. მის მიმართ ინტერესი "ლიონმა", "რენმა" და "ოლიმპიაკოსმა" გამოხატეს, მაგრამ შეთავაზება არ გაუკეთებიათ. "ბარსელონა" იმედოვნებს, რომ ფრანგი სატრანსფერო ფანჯრის ბოლომდე გუნდს დატოვებს.

ფრენკი დე იონგი - თუ "ბარსას" ბერნარდუ სილვას შეძენა სურს, დე იონგის გაყიდვა აუცილებლად მოუწევს, რატა "სიტის" მოთხოვნილი €100 მილიონის გადახდა შეძლოს. ნიდერლანდელი "ჩელსისა" და "მანჩესტერ იუნაიტედს" სურთ, თუმცა ფეხბურთელს "ოლდ ტრაფორდზე" გადაბარგება არ სურს, ამიტომ უფრო დიდი შანსია, მან კარიერა ლონდონურ გუნდში განაგრძოს.

მარტინ ბრეითუეიტი - დანიელს "ბარსასთან" 2024 წლამდე არსებული კონტრაქტის ამოწურვა სურს და კლუბის დატოვებაზე უარს ამბობს, რის გამოც კატალონიელები მოთმინებას კარგავენ, რამაც შესაძლოა რადიკალური ნაბიჯი გამოიწვიოს. 31 წლის თავდამსხმელის შეძენა ლა ლიგისა და სერია A-ს კლუბებს სურთ. "ბარსელონას" სჯერა, რომ მარტინი საბოლოოდ კლუბს დატოვებს.

აბდე ეზალზული - აბდეს წასვლა იმაზეა დამოკიდებული, თუ როგორ განვითარდება მოვლენები სატრანსფერო ფანჯრის ბოლო დღეებში. ეზალზულის შეძენა "ჟირონას" სურს, რომელიც "ბარსას" პასუხს უცდის. შესაძლოა, კატალონიელებმა 20 წლის შემტევი ერთ-ერთ ტრანსფერში ჩართონ.