5 მარჯვენა მცველი ბარსელონას რადარზე

ცნობილია, რომ, ბერნარდუ სილვასა და მარკოს ალონსოს გარდა, "ბარსელონა" მიმდინარე სატრანსფერო ფანჯარაზე მარჯვენა მცველის შეძენასაც აპირებს.

ჩავი ერნანდესი სერჟინიო დესტს არ ენდობა, სერჟი რობერტო, რონალდ არაუხო და ჟიულ კუნდე კი ნომინალური მარჯვენა მცველები არ არიან, რის გამოც, მწვრთნელმა ამ პოზიციის ფეხბურთელის დაუყოვნებლივ ყიდვა მოითხოვა.

ჟერარ რომეროს ინფორმაციით, კატალონიური კლუბი 5 მარჯვენაფლანგელს აკვირდება - ესენი არიან: აარონ ვან-ბისაკა ("მანჩესტერ იუნაიტედი"), ჯერემი ფრიმპონგი ("ბაიერ ლევერკუზენი"), დიოგუ დალოტი ("მანჩესტერ იუნაიტედი"), ხუან ფოიტი ("ვილიარეალი") და ტომას მუნიე ("დორტმუნდი").

წყაროს ცნობით, ჩამოთვლილ მოთამაშეებს შორის "ბარსელონა" უპირატესობას მუნიესა და ფოიტს ანიჭებს, პრიორიტეტი კი ეს უკანასკნელია. "ბარსა" ფიქრობს, რომ "ვილიარეალი" არგენტინელს €25 მილიონად დააფასებს, "ბორუსიას" ბელგიელი მცველი კი დაახლოებით €10/12 მილიონი ღირს.

ჩავი ერნანდესს სესარ ასპილიკუეტას ტიპის ფლანგელის შეძენა სურს, რომელსაც თამაში როგორც მარჯვენა მცველად, ისე ცენტრალურ მცველად შეეძლება. კლუბი ექტორ ბელერინის კანდიდატურას არ განიხილავს, რადგან ის ჩავის სისტემაში არ ჯდება.