ჟიულ კუნდე: დიდ გუნდში გადმოსვლით ძალიან ამაყი ვარ
"ბარსელონას" ახალწვეული, ჟიულ კუნდე კლუბის ოფიციალურ არხთან პირველად საუბრობს.
ამ შესაძლებლობისთვის ძალიან ამაყი, მადლობელი და აღფრთოვანებული ვარ - დიდ გუნდში გადმოვედი.
"ბლაუგრანაში" თამაშსა და ახალი თანაგუნდელების გაცნობას მოუთმენლად ველი. ჩემს მაქსიმუმს გავიღებ.
რა თქმა უნდა, "სევილიაც" შესანიშნავი კლუბია, მაგრამ, ვფიქრობ, "ბარსაში" ტრანსფერი კარიერაში წინ გადადგმული ნაბიჯია როგორც პიროვნულად, ისე საფეხბურთო კუთხით, რის გამოც ძალიან ბედნიერი ვარ.
მინდა, ყველა მატჩისა და ტიტულის მოსაგებად ვიბრძოლო - აქ სწორედ ამიტომ ვიმყოფები.
ვინც არ მიცნობს, ვეტყვი, რომ დინამიკური ფეხბურთელი ვარ, რომელსაც ენერგია აქვს და ბურთთან ერთად კარგად თამაში შეუძლია - დაცვა მეხერხება და აგრესიული ვარ.
ჩავი ერთ-ერთი მიზეზია, რატომაც აქ გადმოვბარგდი. მას რამდენჯერმე ვესაუბრე და ჩემი დარწმუნება შეძლო. ჩვენი ხედვები ერთმანეთს ემთხვევა.
ყველაფერს გავაკეთებ, რომ მოედანზე რაც შეიძლება დიდი დრო გავატარო, გუნდში თავი დავიმკვიდრო და მნიშვნელოვანი როლი მქონდეს.
რა თქმა უნდა, მიზნები დასახული მაქვს, მაგრამ ლიმიტი არ გამაჩნია - საკუთარ თავს ჩარჩოებში არ ვაქცევ და საზღვრებს არ ვუწესებ.
მსურს, გუნდურ ასპექტში პროგრესი განვიცადო და ინდივიდუალურადაც განვვითარდე. "ბარსელონა" დიდი კლუბია, უმაღლესი დონის ფეხბურთელებით დაკომპლექტებული, რომლებსაც არაერთი ტიტული მოუგიათ, და მინდა, ბევრი ვისწავლო.
ჩემი აღნიშვნა? ამას იმიტომ ვაკეთებ, რომ კალათბურთიც მიყვარს - ეს ჟესტი "შავ მამბას" (კობი ბრაიანტი) ეძღვნება.
- ციტირებს ფრანგის სიტყვებს Barça TV.
კუნდეს ტრანსფერის ფინანსური დეტალები ჯერ ოფიციალურად ცნობილი არაა, მაგრამ, გავრცელებული ინფორმაციით, "ბარსელონა" ფრანგის სანაცვლოდ €50+€5 მილიონს გადაიხდის და ფეხბურთელს 5-წლიან კონტრაქტს გაუფორმებს. მისი გამოსასყიდი თანხა €1 მილიარდი იქნება.
ამასთან, აღსანიშნავია, რომ ჟიული "ბარსას" ისტორიაში ყველაზე ძვირადღირებული მცველი გახდა და კლემან ლანგლეს (€35.9) გადაასწრო. იმ 4 უკანახაზელს შორის, რომელშიც კლუბმა ყველაზე დიდი თანხა გადაიხადა, 3 (დანი ალვესი, კლემან ლანგლე, ჟიულ კუნდე) "სევილიაში" თამაშობდა.
ამ სიახლეზე კომენტარები გათიშულია.
კომენტარები [ 13 ]