ლიდსთან შეთანხმება მიღწეულია - რაფინია ბარსელონაში გადმოდის

ჟერარ რომეროს ინფორმაციით, "ბარსელონამ" და "ლიდს იუნაიტედმა" შეთანხმებას მიაღწიეს.

"ლურჯ-ბროწეულისფერები" ინგლისურ კლუბს რაფინიას სანაცვლოდ 60 მილიონ ევროს, სამ ნაწილად გადაუხდიან. კატალონიურ გრანდში ბრაზილიელი შემტევის წლიური ანაზღაურება 6 მილიონი იქნება.

მიუხედავად იმისა, რომ "ჩელსისა" და "ლიდსს" 25 წლის ფეხბურთელის თაობაზე ყველაფერი შეთანხმებული ჰქონდათ და ლონდონური გუნდი ბევრად დიდ თანხას იხდიდა (თანაც, ერთბაშად), რაფინიამ და დეკუმ "ბარსელონაში" ტრანსფერისთვის ყველაფერი გააკეთეს, რადგან ეს ბრაზილიელის ოცნება იყო. ამის გამო მან "ნიუკასლ იუნაიტედის" მიერ გაკეთებული გიჟური შეთავაზებაც დაბლოკა.

წყაროს ცნობით, მხარეებს მოსაგვარებელი მხოლოდ ერთი პატარა დეტალი დარჩათ. რაფინია ბარსელონაში სახლის მოსაძებნად უკვე ემზადება.

ბრაზილიელი ფეხბურთელი ბავშვობიდან კულეა. მამამისს რონალდინიოსთან ძალიან კარგი ურთიერთობა ჰქონდა და მის ოჯახს ყოველთვის სურდა, რაფინიას "ბარსაში" ეთამაშა.