ტრინკაუს ტრანსფერს ხელს FIFA-ს ახალი წესი უშლის

ჯერ კიდევ "ბარსელონას" საკუთრებაში მყოფი ფრანსიშკუ ტრინკაოს ლისაბონის "სპორტინგში" იჯარით გადასვლა თითქმის გადაწყვეტილი იყო, მაგრამ გარიგებას ხელი FIFA-ს ახალმა რეგულაციამ შეუშალა.

იანვარში ფიფამ საიჯარო ხელშეკრულებებთან დაკავშირებით ახალი წესები მიიღო. ერთი წესის თანახმად ორ კლუბს შორის მაქსიმუმ 3 ფეხბურთელი უნდა იყოს განათხოვრებული, მეორე წესი კი ტრინკაუს ტრანსფერს ეხება. რეგულაციით, რომელიც ძალაში 1 ივლისს შედის, 21 წელს გადაცილებული ფეხბურთელის განათხოვრება მაქსიმუმ 1 წლით შეიძლება.

"ბარსელონა" და "სპორტინგი" აპირებდნენ, ტრინკაუს პორტუგალიურ კლუბში 2 წელი იჯარით ეთამაშა, რის შემდეგაც ლისაბონელებს მისი 20-25 მილიონ ევროდ გამოსყიდვის ვალდებულება ექნებოდათ. ახლა ტრანსფერი საფრთხეშია, რადგან "სპორტინგი" დარწმუნებული არაა, რომ ერთი წლის შემდეგ ამ თანხის გადახდას შეძლებს, ორწლიანი იჯარა კი აღარ შეიძლება, რადგან ტრინკაუ უკვე 22 წლისაა.