ოფიციალურად: გამპერის თასზე ბარსელონას მეტოქე რომა იქნება

რამდენიმე წუთის წინ "ბარსელონამ" ოფიციალურად დაადასტურა, რომ 2022 წლის გამპერის თასზე კატალონიური გუნდის მეტოქე როგორც კაცებში, ასევე ქალებში იტალიური "რომა" იქნება.

აქამდე ცნობილი იყო, რომ გამპერის თასის ორივე თამაში 6 აგვისტოს გაიმართებოდა. არაოფიციალური ინფორმაციით "ბლაუგრანას" მეტოქე "რომა" უნდა ყოფილიყო და ეს ინფორმაცია დღეს დადასტურდა.

"კამპ ნოუზე" პირველად ერთმანეთს "ბარსელონასა" და "რომას" ქალების გუნდები დაუპირისპირდებიან. თამაში ჩვენი დროით 19:30 საათზე დაიწყება.

21:50 საათზე "ბარსას" კაცებისა და ქალების გუნდების პრეზენტაცია შედგება.

23:00 საათზე კი მოედანზე უკვე კატალონიელთა და რომაელთა მამაკაცების გუნდებს ვიხილავთ.

უკვე მეორედ ხდება, რომ გამპერის თასზე კაცების გარდა ქალების გუნდიც თამაშობს. პირველად ეს შარშან მოხდა, როდესაც "ბარსამ" "იუვენტუსი" კაცებში 3-0, ხოლო ქალებში 6-0 გაანადგურა.

"რომა" ამ ამხანაგურ ტურნირზე მეორედ ითამაშებს. 2015 წელს იტალიელები "კამპ ნოუზე" 0-3 დამარცხდნენ.

ამ მატჩში განსაკუთრებულ ინტერესს ჟოზე მოურინიოს "კამპ ნოუზე" დაბრუნება იწვევს.