Mundo Deportivo ბარსელონაზე | რაფინია, დემბელე, ტერ შტეგენი, პენია, ტენასი...

კატალონიური გამოცემა Mundo Deportivo "ბარსელონას" სატრანსფერო გეგმებზე წერს.

კესიე, კრისტენსენი

მიუხედავად იმისა, რომ კესიესა და კრისტენსენს "მილანთან" და "ჩელსისთან" კონტრაქტები 30 ივნისამდე აკავშირებთ, "ბარსას" მათი ტრანსფერის დადასტურება უკვე შეუძლია. თუმცა, კატალონიური კლუბი არ ჩქარობს და, შესაძლოა, ოფიციალური განცხადება რამდენიმე კვირით გადაიდოს.

ასპილიკუეტა, ალონსო

"ბარსა" მათთან მოლაპარაკებებს დააჩქარებს. სესარი ჩავისთვის პრიორიტეტია, მარკოსი კი გუნდს ჟორდი ალბას დუბლიორად სურს.

"ბლაუგრანა" "ჩელსისთან" შეთანხმებას მათი ახალი მფლობელების დანიშვნისთანავე შეეცდება. 

შესაძლოა, "ლურჯ-ბროწეულისფერები" ალონსოს აგენტს ორშაბთს შეხვდნენ. ინგლისში მის კლიენტს 15 მილიონად აფასებენ, მაგრამ "ბარსას" ფასის დაკლება უნდა.

ასპილიკუეტას შეძენა უფრო მარტივი იქნება, რადგან მან "სტემფორდ ბრიჯზე" 10 წელი გაატარა და, დიდი ალბათობით, კლუბი ესპანელს წასვლის უფლებას მისცემს.

რაფინია, დემბელე

"ბარსელონა" რაფინიას მხოლოდ იმ შემთხვევაში შეიძენს, თუ დემბელე წავა. წინააღმდეგ შემთხვევაში, "ლურჯ-ბროწეულისფერები" ბრაზილიელს ვერ დაარეგისტრირებენ.

კლუბს სურს, უსმანის გადაწყვეტილება რაც შეიძლება მალე გაიგოს. მხარეებს შორის შეხვედრა, რომელსაც დემბელე და ჩავი დაესწრებიან, ამ კვირაში იგეგმება. 

რაფინიას პრიორიტეტი "ბარსელონაში" გადმოსვლაა და მისი აგენტი დეკუ კლუბთან კონტაქტს ინარჩუნებს. თუ დემბელე გუნდს დატოვებს, ჩავი რაფინიას ენდობა და კატალონიელებმა "ლიდსთან" შეთანხმებას უნდა მიაღწიონ.

ბრეითუეიტი, პიანიჩი

ბრეითუეიტსა და პიანიჩს წასვლა არ უნდათ, რაც, ფინანსური Fair Play-ს გამო, "ბარსასთვის" პრობლემა იქნება. 

მათ გარდა, კლუბმა ნეტუს, უმტიტისა და ლანგლეს მომავალიც უნდა განიხილოს. 

ტერ შტეგენი, ნეტუ, პენია, ტენასი 

"ბარსელონას" ნეტუს გაყიდვა სურს და მას დაახლოებით 5.6. მილიონ ევროდ შეელევა.

"ბარსამ" იცის, რომ ტერ შტეგენი კარიერის საუკეთესო ეტაპზე არაა და, თუ სარფიან შემოთავაზებას მიიღებს, გერმანელის გაშვებაზე დაფიქრდება. თუ ასე არ მოხდა, ტერი კვლავ პირველი ნომერი იქნება.

გუნდიდან ნეტუ წასვლის შემთხვევაში, მის შემცვლელად ინიაკი პენიას დაწინაურება მოიაზრება.

არნაუ ტენასი კი, რომელიც ამ მომენტისთვის მესამე მეკარეა, შესაძლოა, ზაფხულში კლუბიდან იჯარით წავიდეს.