მესის გარემოცვა ლაპორტას განცხადებებით უკმაყოფილოა

ლიონელ მესისა და ჟოან ლაპორტას შორის დაძაბული ურთიერთობა უფრო თვალსაჩინო ხდება.

Cadena Ser-ის ინფორმაციით, არგენტინელ ფეხბურთელი და საკუთარი გარემოცვა "ბარსელონას" პრეზიდენტის განცხადებებით უკმაყოფილონი არიან. 

ლაპორტამ რამდენიმე დღის წინ L'Esportiu-სთან ინტერვიუში "ლა პულგაზე" კიდევ ერთხელ ისაუბრა. მან განაცხადა, რომ ისურვებდა, ლეოს კარიერა "ბარსაში" დაესრულებინა, თუმცა ფინანსური Fair Play-სა და "პარი სენ-ჟერმენის" შეთავაზების გამო, ეს არ გამოვიდა. ჟოანმა ასევე დასძინა, რომ მესი "ბლაუგრანაში" მხოლოდ თავისუფალი აგენტის სტატუსით თუ დაბრუნდება და კლუბი მის სანაცვლოდ ფულს არ გადაიხდის.

როგორც წყაროს იტყობინება, არგენტინელის გარემოცვას ლაპორტას განცხადებები მობეზრდა. რამდენიმე თვის წინ ლეოს მამამ, ხორხე მესიმ ჟოანს პირადადაც დაურეკა და სთხოვა, რომ საჯაროდ მესის ხსენება შეწყვიტოს.

ოქროს ბურთის შვიდგზის მფლობელი კატალონიურ კლუბთან კონტრაქტის გახანგრძლივებას აპირებდა, თუმცა ფინანსური რეგულაციების გამო, ეს ვერ მოხერხდა და მას გუნდის დატოვებამ მოუწია. ზაფხულში ლაპორტა მესის წასვლის მიზეზად მხოლოდ კლუბის ეკონომიკურ მდგომარეობას ასახელებდა, თუმცა, როგორც ვნახეთ, რამდენიმე დღის წინ მან პსჟ-ის სარფიან შეთავაზებასაც გაუსვა ხაზი.