ელენა ფორტი: აინტრახტის თამაშის ბილეთებით ბარსამ ძალიან ცუდი 3 მილიონი გამოიმუშავა
ინსტიტუციურ საკითხებში "ბარსელონას" ვიცე-პრეზიდენტი ელენა ფორტი "აინტრახტთან" გუშინ გამართული შეხვედრის დროს ტრიბუნებზე არსებულ უსიამოვნო სიტუაციას ეხმაურება.
ევროპა ლიგის გუშინდელ მატჩში სტუმარი გუნდისთვის 5 ათასი ბილეთი იყო გამოყოფილი, მაგრამ მაყურებელი ძალიან მარტივად მიხვდებოდა, რომ ტრიბუნებზე "აინტრახტის" თეთრ მაისურში გამოწყობილი ბევრად მეტი გულშემატკივარი იმყოფებოდა. ამან სტადიონზე მყოფი ქომაგების უკმაყოფილება გამოიწვია. მომხდართან დაკავშირებით კომენტარი "ბლაუგრანას" პრეზიდენტმა, ჟოან ლაპორტამაც გააკეთა.
Cadena SER-თან საუბრისას ელენა ფორტი აცხადებს:
"აინტრახტთან" თამაშის ბილეთების გაყიდვით კლუბმა 3 მილიონი ევრო მიიღო, მაგრამ ეს ძალიან ცუდი სამი მილიონია. გუშინ მომხდარში მთავარი დამნაშავე კლუბია. ამაზე რეაგირება უნდა მოვახდინოთ. თვალები უნდა გავახილოთ და საქმეს მივხედოთ. პასუხისმგებლობას ვერ გავექცევით. არ მინდა, დავივიწყო ჩვენი კლუბის ის წევრები, რომლებიც გუშინდელ თამაშზე მოვიდნენ. მათ ბოდიშს ვუხდი
ძალიან მნიშვნელოვანია, გავიგოთ, რა არხებით იყიდეს "აინტრახტის" გულშემატკივრებმა ამდენი ბილეთი. კლუბმა ყველა საჭირო ზომა მიიღო იმისათვის, რომ მეტოქე გუნდის გულშემატკივრებს დამატებითი ბილეთები ვერ ეყიდათ, მაგრამ როგორც აღმოჩნდა, ეს საკმარისი არ იყო. ამ ეტაპზე არ ვიცით, როგორ მოახერხეს "აინტრახტის" გულშემატკივრებმა ეს. ამას მალე გავარკვევთ.
ამ სიახლეზე კომენტარები გათიშულია.
კომენტარები [ 20 ]