ოფიციალურად: Spotify ბარსელონას მთავარი სპონსორი ხდება
"ბარსელონას" ოფიციალური საიტის ინფორმაციით, კლუბმა Spotify-სთან შეთანხმებას მიაღწია.
შვედური კომპანია მომდევნო სეზონიდან "ბარსას" მთავარი სპონსორი და აუდიო სტრმინგის ოფიციალური პარტნიორი იქნება. მხარებმა 4-წლიან შეთანხმებას მიაღწიეს, რომელიც ძალაში მომდევნო სეზონიდან შევა.
წარწერა Spotify 2022/23 წლების სეზონიდან მომდევნო 4 სეზონის განმავლობაში ქალთა და მამაკაცთა გუნდების მაისურების წინა მხარეს, 3 სეზონის განმავლობაში კი სავარჯიშო ფორმაზე გამოჩნდება.
კლუბის ისტორიაში პირველად სტადიონის სახელწოდება შეიცვლება და მისი ახალი სახელი "Spotify კამპ ნოუ" იქნება.
კლუბის დირექტორთა საბჭოს მიერ ხელმოწერილი შეთანხმება საბოლოოდ დასამტკიცებლად კლუბის დელეგატ წევრთა ასამბლეას 3 აპრილს წარედგინება და ხმის მიცემა ელექტრონულად იქნება შესაძლებელი.
ამ თანამშრომლობის ფარგლებში, Spotify მომდევნო სეზონიდან "ბარსელონას" მთავარი პარტნიორი გახდება. გრძელვადიანი შეთანხმება სტადიონის სახელის უფლებაზე კი 2022 წლის ივლისიდან დაიწყება და გაგრძელდება "კამპ ნოუს" განახლებით, რომელიც Espai Barca-ს პროექტის ერთ-ერთი მთავარი ნაწილია.
"ბარსასა" და Spotify-ს შეთანხმება კლუბის ისტორიაში პირველია, რომელიც აერთიანებს საფეხბურთო და მუსიკალურ სამყაროებს და არტისტებსა და ფეხბურთელებს მთელ მსოფლიოში ფართო სცენას სთავაზობს გულშემატკივრებთან დასაკავშირებლად.
გარდა ამისა, "ბარსელონა" და Spotify იმუშავებენ, რომ გამოიყენონ სტადიონის სარეკლამო სივრცეები, რათა არტისტების ნამუშევრები კლუბის გლობალურ სატელევიზიო აუდიტორიას წარუდგინონ.
Spotify-სთან შეთანხმება ნაწილია კლუბის მიზნისა, მოიძიოს პარტნიორები, რომლებიც იზიარებენ იმ ღირებულებებსა და ფილოსოფიას, რაც "ბარსელონას" ბრენდს განსაზღვრავს.
ჟოან ლაპორტას განცხადება
ძალიან ამაყები ვართ, გამოვაცხადოთ ინოვაციური თანამშრომლობა მსოფლიოში ცნობილ ისეთ ორგანიზაციასთან, როგორიცაა Spotify. ეს პარტნიორობა საშუალებას მოგვცემს, გავაგრძელოთ კლუბის დაახლოება გულშემატკივრებთან და უფრო მეტად ვაგრძნობინოთ თავი "ბარსელონას" ოჯახის ნაწილად იმ უნიკალური გამოცდილების წყალობით, რომელიც სპორტსა და გართობას აერთიანებს და რაც შესაძლებლობას მოგვცემს, მსოფლიოს გარშემო ახალ აუდიტორიას დავუკავშირდეთ.
ეს ასევე არის კავშირი, რომლითაც გავაგრძელებთ წინსვლას ახალ ეპოქაში და რომელიც კიდევ ერთხელ აჩვენებს ინოვაციურ ხასიათსა და ბრწყინვალების მუდმივ ძიებას, რაც "ბარსას" გამოარჩევს და მსოფლიოში უნიკალურ კლუბად აქცევს.
Spotify-ს ბიზნეს ოფიცრის, ალექს ნორსტრიომის განცხადება
ივლისიდან, ჩვენი თანამშრომლობა არტისტებს, ფეხბურთელებსა და ფანებს ახალბრენდირებულ "Spotify კამპ ნოუზე" გლობალურ სცენას შესთავაზებს. ჩვენ ყოველთვის ვიყენებდით ჩვენს ინვესტიციებს არტისტების გასაძლიერებლად და ეს პარტნიორობა ამ მიდგომას ახალ მასშტაბზე გადაიყვანს. ჩვენ მოხარული ვართ, რომ შევქმნით ახალ შესაძლებლობას მსოფლიოს მასშტაბით "ბარსელონას" ახალ გულშემატკივრებთან დასაკავშირებლად.
Spotify-ს მისია ადამიანის შემოქმედების პოტენციალის გახსნა და არტისტების მხარდაჭერაა. ჩვენ გვჯერა, რომ ეს თანამშრომლობა ქმნის ახალ შესაძლებლობებს ამ მისიის შესასრულებლად უნიკალური, წარმოსახვითი და ეფექტური გზებით.
ამ სიახლეზე კომენტარები გათიშულია.
კომენტარები [ 26 ]