სანქციები ჩელსის და კარგი ამბავი ბარსელონასთვის
ლონდონის "ჩელსი" რუსი მესაკუთრის მიმართ დაწესებული ახალი სანქციების გამო სერიოზული პრობლემების წინაშე აღმოჩნდა, რის გამოც "ლურჯებს" ფეხბურთელებისთვის ახალი კონტრაქტების შეთავაზება აღარ შეუძლია, ეს კი "ბარსელონასთვის" კარგი ამბავია.
რამდენიმე წუთის წინ ცნობილი გახდა, რომ ვლადიმერ პუტინთან დაახლოებული პირის სტატუსის გამო რომან აბრამოვიჩს "ჩელსის" გაყიდვის უფლება ჩამოართვეს, თავად კლუბს კი შეზღუდვა არაერთი მიმართულებით დაუწესეს. ერთ-ერთი შეზღუდვა ახალი ფეხბურთელების დამატებასა და ამჟამინდელი ფეხბურთელებისთვის ახალი კონტრაქტების შეთავაზებას ეხება. ლონდონელები უახლოეს მომავალში მოთამაშეებს ახალ ხელშეკრულებებს ვერ გაუფორმებენ.
ამჟამად "ჩელსიში" 3 ფეხბურთელი ირიცხება, რომელთა კონტრაქტსაც ვადა სეზონის ბოლოს გასდის. ანტონიო რუდიგერით "რეალია" დაინტერესებული და მადრიდელებს გერმანელის ხელში უფასოდ ჩაგდება ახლა უფრო გაუადვილდებათ. დანარჩენ ორ მოთამაშეს კი "ბარსას" უკავშირებენ. გავრცელებული ინფორმაციით ანდრეას კრისტენსენის "ბარსელონაში" ტრანსფერი ისედაც გადაწყვეტილი და გაფორმებული იყო, ახალი შეზღუდვა კი სესარ ასპილიკუეტას შემთხვევაზე იმოქმედებს. ვინაიდან "ჩელსი" მას ახალ კონტრაქტს ვერ გაუფორმებს, 32 წლის ესპანელის "ბარსელონაში" უფასოდ გადმოსვლის შანსები მნიშვნელოვნად იზრდება.
ამ სიახლეზე კომენტარები გათიშულია.
კომენტარები [ 22 ]