ბარსასთან თამაშის წინ ნაპოლიმ ქულები და დი ლორენცო დაკარგა
იტალიის სერია A-ს 26-ე ტურის შეხვედრა "ბარსელონას" მეტოქისთვის, "ნაპოლისთვის" წარუმატებელი გამოდგა. ნეაპოლელებმა ქულებიც დაკარგეს და გუნდის კიდევ ერთი ლიდერიც.
დღეს ცნობილი გახდა, რომ "ნაპოლის" ლიდერის, ლორენცო ინსინიეს "ბარსელონასთან" თამაში კითხვის ნიშნის ქვეშ დგას. კატალონიელებთან ხუთშაბათს გასამართი შეხვედრისთვის ლუჩანო სპალეტიმ გუნდის რამდენიმე წამყვანი ფეხბურთელი დაასვენა, მაგრამ ჯოვანი დი ლორენცოს ვერ შეელია.
საბოლოოდ ისე გამოვიდა, რომ "ნაპოლიმ" გასავარდნ ზონაში მყოფ "კალიარისთან" ქულები დაკარგა, დი ლორენცომ კი პირველივე ტაიმში თავის არეში ტრავმა მიიღო და მოედანი დატოვა.
რამდენად მნიშვნელოვანი ფეხბურთელია ჯოვანი დი ლორენცო "ნაპოლისთვის"? დღევანდლამდე მან მიმდინარე სეზონში გუნდის ყველა თამაში სრულად ჩაატარა და ის ასეთი ერთადერთი მოთამაშე იყო. დი ლორენცო სპალეტისთვის აშკარად ძალიან მნიშვნელოვანი მოთამაშეა და "ბლაუგრანასთან" მისი თამაში საეჭვოა.
"ნაპოლი" და "ბარსა" ერთმანეთს ევროპა ლიგაზე ხუთშაბათს, 24 თებერვალს იტალიაში დაუპირისპირდებიან. ესპანეთში გამართული პირველი თამაში 1-1 დასრულდა.
ამ სიახლეზე კომენტარები გათიშულია.
კომენტარები [ 15 ]