მესამე წითელი ბარათი 2022 წელს

"კორნელია-ელ პრატზე" გამართულ დერბიში ერნანდეს ერნანდესმა ჟერარ პიკე მოედნიდან გააძევა.

აღსანიშნავია, რომ 2022 წელს "ბარსას" ფეხბურთელი უკვე მესამედ გააძევეს. ევროპაში ამაზე "უკეთესი შედეგი" მხოლოდ "არსენალს" აქვს - 4 წითელი ბარათი.

პირველად, გავი გააგდეს. "გრანადასთან" მატჩი "ბარსას" გამარჯვებისკენ მშვიდად მიჰყავდა, თუმცა 79-ე წუთზე 17 წლის ფეხბურთელის უხეშობას მეორე ყვითელი ბარათი მოჰყვა. კაცნაკლულ გუნდს თამაში აერია და, საბოლოოდ, ანდალუსიიდან მხოლოდ ერთი ქულა წამოვიღეთ.

დანი ალვესის "ატლეტიკოსთან" გაძევებას ესპანეთში რამდენიმე დღე განიხილავდნენ. კარასკომ მას ბრალი განზრახ უხეშობაში დასდო. დანი ორმატჩიანი დისკვალიფიკაციით დაისაჯა. "ბარსამ" სასჯელი ზომა გაასაჩივრა, თუმცა, როგორც ყოველთვის, უშედეგოდ.

გუშინ კი, ჟერარ პიკესა და ნიკო მელამედის ინციდენტს ორმაგი გაძევება მოჰყვა. ერნანდეს ერნანდესს წითელი ბარათების ჩვენება უყვარს. მან "ბარსელონას" მონაწილეობით გამართულ თამაშში 30-ედ იმსაჯა და მის ანგარიშზე უკვე 10 წითელი ბარათია. პიკესა და მელამედის გარდა, ლუკ დე იონგის გოლის შემდეგ, მან "ესპანიოლის" სათადარიგოთა სკამიდან მანუ მორლანესის გაგდებაც მოასწრო.

შემდეგ ტურში, "ბარსას" "მესტალიაზე" სტუმრობა უწევს. ამ თამაშში ალვესისა და პიკეს თამაში გამორიცხულია და, შესაძლოა, ვერც არაუხო ვიხილოთ. ჯერჯერობით, ურუგვაელის რეაბილიტაციის პროცესის ზუსტი ხანგრძლივობა უცნობია.