რეალმა თვალი ბარსელონას ქალთა გუნდის ერთ-ერთ ლიდერს დაადგა

მადრიდის "რეალმა" თვალი "ბარსელონას" ქალთა გუნდის ერთ-ერთ ლიდერს, ჯენიფერ ერმოსოს დაადგა. ამ ინფორმაციას AS ავრცელებს.

ჯენი ერმოსო როგორც "ბარსელონას", ასევე ესპანეთის ნაკრების ისტორიაში საუკეთესო ბომბარდირია. ის ლა ლიგის ბოლო 3 და ჩემპიონთა ლიგის ბოლო გათამაშების საუკეთესო ბომბარდირიც გახდა.

მიმდინარე სეზონში ერმოსომ "ბარსაში" პოზიციები ცოტათი დათმო. ლა ლიგის ბომბარდირთა დავის სათავეში სამი "ბარსელონელია" და მათ შორის ერმოსო არ შედის. ის მე-5 ადგილს იკავებს.

ერმოსოს "ბარსელონასთან" კონტრაქტი მიმდინარე სეზონის ბოლოს უმთავრდება და "რეალმა" გადაწყვიტა, ამით ისარგებლოს. ერმოსო მადრიდელია, მან ფეხბურთის თამაში ამ ქალაქში ("ატლეტიკოში") დაიწყო და ჯამში 7 წელი ითამაშა. ამას ისიც ემატება, რომ "რეალის" ქალთა გუნდი ნელ-ნელა ძლიერდება. მაგალითად ბოლო შეხვედრაში მადრიდელები "ბარსასთან" მხოლოდ 1-3 დამარცხდნენ.

ქალთა ფეხბურთში "ბარსელონასა" და "რეალს" შორის დიდად პრინციპული დაპირისპირება არაა და ერთი გუნდიდან მეორეში ფეხბურთელის გადასვლა განსაკუთრებული შემთხვევა არ იქნება. თუმცა AS იმასაც იტყობინება, რომ ერმოსო "ბარსაში" ბედნიერია.