კრიშტიანუ რონალდუმ საკუთარი თავი ბარსელონას შესთავაზა - MD
კატალონიური Mundo Deportivo სენსაციურ ინფორმაციას ავრცელებს - კრიშტიანუ რონალდუმ საკუთარი თავი "ბარსელონას" შესთავაზა.
პორტუგალიელის "მანჩესტერ იუნაიტედში" დაბრუნება ისეთი არ გამოდგა, როგორიც მას წარმოედგინა. თავად ფეხბურთელი კარგ შედეგებს აჩვენებს, რასაც მის გუნდზე ვერ ვიტყვით. ინგლისელებმა ჩემპიონთა ლიგის ჯგუფის ყველა თამაშში იწვალეს, პრემიერ ლიგაში კი ისინი ლიდერს 19 ქულით ჩამორჩებიან. ამის პარალელურად "ბარსელონა" ეძებს ფეხბურთელს, რომელიც ბევრი გოლის გატანას შეძლებს.
კატალონიური პრესის ცნობით, ამ ფაქტორების ერთობით, შესაძლოა, საუკუნის ტრანსფერი მივიღოთ. Mundo Deportivo-ს ჟურნალისტების ინფორმაციით, პორტუგალიელი მისი მეგობრის, ჟერარ პიკეს საშუალებით ჩავი ერნანდესს რამდენიმე დღის წინ უკვე დაუკავშირდა. პარალელურად კრიშტიანუს აგენტი ჟორჟე მენდეში ჟოან ლაპორტასთან და მატეუ ალემანისთან, რომლებთანაც მას მეგობრობა აკავშირებს, მოლაპარაკებებს აწარმოებს.
MD-ს ცნობით, ამბის გაგების შემდეგ ჩავის რეაქცია იყო: "გოლებსა და გამოცდილებას შეგვმატებს, ეს უდავოა." თუმცა კატალონიელმა ჟერარ პიკეს ჰკითხა, რამდენად კარგია რონალდუ პოზიციურ თამაშში.
იმავე წყაროს მტკიცებით, ჟერარ პიკე, რომელმაც, როგორც ჩანს, შუამავლის როლი იტვირთა, ლეო მესისაც დაუკავშირდა, მიზანი კი იმის გაგება იყო, ხომ არ ისურვებდა არგენტინელი ბარსელონას გარეუბან კასტალდელფელსში მისი სახლის კრიშტიანუ რონალდუსთვის მიქირავებას. რატომ მაინცდამაინც მესის სახლი? რონალდუ აღფრთოვანებული ყოფილა იდეით, სახლში 7 "ოქროს ბურთი" ჰქონდეს. მესის პასუხი კი ასეთია: "თუ ოქროს ბურთებს მოუფრთხილდება და მათ არ წაიღებს, მაშინ პრობლემა არ იქნება."
კატალონიელი ჟურნალისტები იმასაც ამბობენ, რომ რონალდუს ევროპა ლიგაზე თამაშის პერსპექტივაც ხიბლავს. ამის ერთ-ერთი მიზეზი ისაა, რომ მას ეს ტურნირი არასდროს მოუგია, მეორე მიზეზი კი ის, რომ ასე ის მესის "პარი სენ-ჟერმენთან" ჩემპიონთა ლიგაზე დაპირისპირებას თავიდან აირიდებს.
რა ნომერს აიღებს კრიშტიანუ? მას 10 ნომერი უნდოდა, მაგრამ საბოლოოდ 17 შეხვდება, რომელიც ლუკ დე იონგის წასვლის შემდეგ გათავისუფლდება.
რა უშლის ტრანსფერს ხელს? რა თქმა უნდა, ხავიერ ტებასი. ლა ლიგის პრეზიდენტი არ უარყოფს, რომ ის მადრიდისტაა და არ იქნება გასაკვირი, თუ მას მისი საყვარელი კლუბის ლეგენდის "ბარსას" მაისურით ხილვა დიდად არ მოეწონება. შესაბამისად ის და მისი ორგანიზაცია ტრანსფერს ძალიან დეტალურად შეისწავლის და ყველანაირად ეცდება, "ბარსას" მიზნის მიღწევაში ხელი შეუშალოს.
თუ თქვენ ამ ტრანსფერის იდეით აღფრთოვანებული ხართ, შეგიძლიათ, კითხვა აქ შეწყვიტოთ. ხოლო თუ რონალდუს "ბლაუგრანას" მაისურის ხილვა დიდად არ გინდათ, მაშინ კარგი ამბავი გვაქვს - Mundo Deportivo-ზე ეს ყველაფერი ნამდვილად დაიწერა, მაგრამ დღეს 28 დეკემბერია, ეს დღე კი ესპანეთში პირველი აპრილის ტოლფასია.
ამ სიახლეზე კომენტარები გათიშულია.
კომენტარები [ 13 ]