ესპანიოლი - ჩავის საყვარელი მეტოქე

"ბარსელონას" მთავარი მწვრთნელის პოსტზე ჩავი ერნანდესის დებიუტამდე 2 დღეა დარჩენილი. ზეგ, 20 ნოემბერს, "ბლაუგრანა" თანაქალაქელ "ესპანიოლს" უმასპინძლებს.

ჩავი ბარსელონური დერბის ისტორიაში ყველაზე გამოცდილი ფეხბურთელია. მას ამ მატჩში 36-ჯერ უთამაშია.

"ესპანიოლის" წინააღმდეგ გამართულ 36 შეხვედრაში ჩავის 25 მოგება და 6 გოლი დაუგროვდა. ორივე ეს მაჩვენებელი ჩავის კარიერაში საუკეთესოა, სხვა არცერთ გუნდთან მას ამდენი არც მოუგია და არც გაუტანია.

ჩავი "ესპანიოლს" პირველად 1998 წლის 25 ოქტომბერს სტუმრად დაუპირისპირდა. "ბარსელონამ" ის თამაში კლუივერტისა და ჯოვანის გოლებით 2-1 მოიგო. იმედია, ერნანდესი "ესპანიოლის" წინააღმდეგ სამწვრთნელო კარიერასაც წარმატებით დაიწყებს.