ერთი დღე "ბარსას" ისტორიაში - 17 ნოემბერი

წარმოგიდგენთ რუბრიკას "ერთი დღე "ბარსელონას" ისტორიაში". ამჯერად შემოგთავაზებთ "ბარსელონასთან "დაკავშირებულ მოვლენებს, რომლებიც 17 ნოემბერს მოხდა.

თამაშები

17 ნოემბერს "ბარსელონამ" 10 ოფიციალური თამაში ჩაატარა, საიდანაც კატალონიელებმა 8 მოიგეს, 1 ფრედ დაასრულეს და 1 წააგეს.

1910 წელი

"ბარსელონას" დამაარსებელი ჟოან გამპერი კლუბის პრეზიდენტი მეორედ გახდა, ამჯერად 3 წლით.

1935 წელი

"ბარსელონამ" მადრიდის "ატლეტიკო" ლა ლიგის მატჩში 5-1 გაანადგურა. კატალონიელთაგან გოლები ტორედეფლოტმა, ვენტოლრამ, ესკოლამ, საბალომ და ფერნანდესმა გაიტანეს.

1959 წელი

დაიბადა "ბარსელონას" ყოფილი თავდამსხმელი ხუან კარლოს პერეს როხო. 1983-1987 წლებში მან "ბლაუგრანას" მაისურით 94 თამაში ჩაატარა და 10 გოლი გაიტანა. როხომ კატალონიურ გუნდში 1 ესპანეთის ჩემპიონატი და 1 ესპანეთის ლიგის თასი მოიგო.

1970 წელი

18 წლის მოყვარულმა კატალონიელმა მოთამაშემ, იმაკულადა კაბასერანმა ჟურნალ Revista Barcelonista-ში გამოაქვეყნა განცხადება, რომლის საშუალებითაც ის ფეხბურთის თამაშით დაინტერესებულ ქალებს ეძებდა. ასე შეიკრიბა პირველად "ბარსას" ქალთა გუნდი.