საინტერესო ფაქტები ვალენსიასთან თამაშიდან
გუშინ, ლა ლიგის მე-9 ტურში, "ბარსელონამ" "ვალენსიას" უმასპინძლა და მეტოქე, ანგარიშით 3-1, დაამარცხა.
მატჩის დაწყებიდან მალევე ანგარიში ხოსე გაიამ გახსნა, რასაც "ბარსამ" ანსუ ფატის, მემფის დეპაისა და ფილიპე კოუტინიოს გოლებით უპასუხა. ხოსე ბორდალასის გუნდს რამდენიმე საგოლე მომენტი ჰქონდა, თუმცა, საბედნიეროდ, მათი გამოყენება ვერ შეძლეს, რაშიც დიდი წვლილი მარკ-ანდრე ტერ შტეგენს მიუძღვის.
მატჩის მიწურულს, "ბარსელონაში" კუნ აგუეროს დებიუტიც ვიხილეთ. "კამპ ნოუზე" შეკრებული პუბლიკა მას ოვაციებით შეხვდა, მას ბურთიც კი არ ჰქონდა მიღებული, როდესაც მაყურებელი უკვე მის სახელს სკანდირებდა.
გთავაზობთ იმ რამდენიმე საინტერესო ფაქტს, რომელიც გუშინდელ შეხვედრაში დაფიქსირდა.
- ანსუ ფატიმ იმ ბოლო 10 მატჩში, რომელიც მან ძირითადი შემადგენლობიდან დაიწყო, მონაწილეობა 9 გოლში მიიღო - 7 გოლი და 2 საგოლე გადაცემა.
- 2020 წლის თებერვლის შემდეგ, ლა ლიგაში ანსუ ფატიმ კარში ზუსტად 16-ჯერ დაარტყა, საიდანაც 11 გოლით დასრულდა.
- ფილიპე კოუტინიოს გოლი ბოლოს 11 თვის წინ, 2020 წლის 29 ნოემბერს ჰქონდა გატანილი.
- ფილიპე კოუტინიო თამაშში 59-ე წუთზე ჩაერთო. მან "ბარსაში" მატჩი სრულად (90 წუთი) ბოლოს 2020 წლის 24 ოქტომბერს, "ელ კლასიკოში" ჩაატარა. შესაძლოა, მან ეს სერია ისევ 24 ოქტომბერს, ისევ "კამპ ნოუზე", ისევ "რეალთან" დაასრულოს.
- 33 წლისა და 137 დღის ასაკში, სერხიო აგუერო "ბარსელონას" მესამე ყველაზე ასაკოვანი დებიუტანტია. ამ მხრივ, მასზე წინ დემეტრიო ალბერტინი (33 წელი და 159 დღე) და ლილიან ტურამი (34 წელი და 251 დღე) არიან.
- 2021 წელს, მემფის დეპაის ანგარიშზე 51 გოლი და ასისტია. ამ მხრივ, მასზე წინ მხოლოდ ლეო მესი (52), ერლინგ ჰოლანდი (53) და რობერტ ლევანდოვსკი (60) არიან.
"ბარსელონას" მომდევნო მატჩი ოთხშაბათს, ჩემპიონთა ლიგის მე-3 ტურში, კიევის "დინამოს" წინააღმდეგ, ელის.
ამ სიახლეზე კომენტარები გათიშულია.
კომენტარები [ 3 ]