ანსუ ფატისთან კონტრაქტის გახანგრძლივება გადაიდო
"ბარსელონას" გუნდის ამომავალ ვარსკვლავთან, ანსუ ფატისთან ახალი კონტრაქტის გაფორმება, შესაძლოა, დროში გაეწელოს.
"ბლაუგრანას" უნდოდა, ფატისთან ხელშეკრულების გახანგრძლივება უახლოეს დღეებში გამოეცხადებინა, მაგრამ, Sport-ის მიერ გავრცელებული ინფორმაციით, მხარეებს შორის შეთანხმება ჯერჯერობით მიღწეული არაა.
წყაროს ცნობით, გუშინ ფატის აგენტი ჟორჟე მენდეში ბარსელონაში ჩაფრინდა. ივარაუდებოდა, რომ მენდეში ქალაქს 18 წლის ფეხბურთელის კონტრაქტთან დაკავშრებით ესტუმრა, თუმცა იგი არც ანსუს, არც მის ოჯახს და არც "ბარსას" წარმომადგენლებს არ შეხვედრია. პორტუგალიელმა აგენტმა კატალონიის დედაქალაქი უკვე დატოვა.
იმავე წყაროს ცნობით, "ბარსასა" და ფატის შორის მოლაპარაკებები, როგორც მოსალოდნელი იყო, ისე სწრაფად არ მიმდინარეობს. შესათანხმებელი ჯერ კიდევ ბევრი დეტალი რჩება.
ამ სიახლეზე კომენტარები გათიშულია.
კომენტარები [ 6 ]