ბარსელონა და ინიაკი პენია იჯარაზე მუშაობენ

კატალონიური Sport "ბარსელონას" ახალგაზრდა მეკარის, ინიაკი პენიას სამომავლო გეგმების შესახებ ინფორმაციას ავრცელებს. 

წყაროს ცნობით, ფეხბურთელის წარმომადგენლები "ბარსას" ხელმძღვანელებთან ერთად მუშაობენ იმისთვის, რომ პენიამ იანვრიდან ახალ გუნდში ითამაშოს. 22 წლის კიპერს, რომელიც რონალდ კუმანის გუნდის განაცხადში ხშირად ხვდება, თუმცა სათამაშო დროს ვერ იღებს, მეტი პრაქტიკა სჭირდება. 

პენიას მსურველები უკვე ჰყავს: კონკრეტული კლუბები ჯერ არ დასახელებულა, მაგრამ ვარიანტები ლა ლიგიდანაა. საუბარი, სავარაუდოდ, 6-თვიან იჯარაზეა. 

ინიაკის განათხოვრება წინა ზაფხულშიც იგეგმებოდა, ამას კი ხელი მარკ-ანდრე ტერ შტეგენის ტრავმამ შეუშალა - "ბარსას" მთავარ მწვრთნელს არ სურდა, სეზონის სტარტზე მხოლოდ ნეტუს იმედად დარჩენილიყო.