ბარსამ 4 წელიწადში 4 ფეხბურთელის ხელფასში მილიარდნახევარი ევრო გადაიხადა
2017-2021 წლებში, "ბარსელონამ" მხოლოდ ოთხი ფეხბურთელის ხელფასში 1.4 მილიარდი ევრო დახარჯა, ამის შესახებ კლუბის აღმასრულებელი დირექტორი, ფერან რევერტერი, აცხადებს.
ჟოზეპ მარია ბართომეუს მმართველობის პერიოდში, კლუბის სახელფასო ბიუჯეტი წლიდან წლამდე იზრდებოდა. 2016/2017 წლების სეზონში, "ბარსელონას" სახელფასო ბიუჯეტმა 471 მილიონი ევრო შეადგინა, 2017/18 - 667, 2018/19 - 722 და 2019/20 - 759. გასული სეზონის სტარტზე, ამ თანხამ 793 მილიონს მიაღწია, რაც 59%-ით მეტია, ვიდრე 2016 წლის მაჩვენებელი.
წინა ბორდის მიერ მიღებული წარმოუდგენელი გადაწყვეტილებების ნათელ მაგალითად რევერტერმა ლიონელ მესის, ფილიპე კოუტინიოს, უსმან დემბელესა და ანტუან გრიზმანის კონტრაქტები მოიყვანა. ოთხ წელიწადში კლუბს მათი შრომის ანაზღაურება 1.4 მილიარდი ევრო დაუჯდა, წელიწადში, საშუალოდ, 350 მილიონი ევრო.
რევერტერმა განაცხადა, რომ "ბარსას" მსგავს კლუბებს 30-50%-ით ნაკლები სახელფასო ბიუჯეტი აქვთ, რაც ფეხბურთელების გაშვებას ძალიან ართულებს. წინა ბორდი გუნდის ვეტერან ფეხბურთელებს გრძელვადიან, ზრდადი ანაზღაურების მქონე ხელშეკრულებებს უდებდა, ახალგაზრდებს კი მოკლევადიან კონტრაქტებს, რაც, რევერტერის თქმით, პირიქით უნდა ყოფილიყო.
ამ სიახლეზე კომენტარები გათიშულია.
კომენტარები [ 6 ]