ტომას მიულერი ბარსასთვის ჩემპიონთა ლიგაზე ყველაზე საშიში მეტოქეა
მიუნხენის "ბაიერნის" შემტევს, ტომას მიულერს "ბარსელონას" კარში გატანა ძალიან უყვარს. 32 წლის ფეხბურთელს კატალონიური გუნდის წინააღმდეგ ჩატარებულ 5 შეხვედრაში 6 გოლი აქვს გატანილი. ჩემპიონთა ლიგაზე კი "ბარსას" კარის ბადე ამდენჯერ არავის შეურხევია. თავის მხრივ, ხსენებულ ტურნირზე გერმანელის საყვარელი მეტოქე სწორედ "ბარსელონაა.
2012/13 წლების სეზონის ნახევარფინალში მიულერმა "ბლაუგრანას" წინააღმდეგ თავი სამჯერ გამოიჩინა. "ალიანც არენაზე" გამართულ პირველ მატჩში ტომასმა დუბლი შეასრულა - ეს შეხვედრა "რეკორდმაისტერმა" 4-0 მოიგო. მომდევნო მატჩში კი, რომელიც "ბარსამ" 3-0 დათმო, გერმანელმა კიდევ ერთი ბურთი შეაგდო.
2014/15 წლების სეზონის ნახევარფინალური ეტაპი "ბარსელონამ" დაძლია, თუმცა "ალიანც არენაზე" 3-2 წააგო და ერთ-ერთი გოლი სწორედ მიულერმა გაიტანა.
ბოლოს კი, 32 წლის შემტევმა 2020 წლის მეოთხედფინალში შეუსრულა "ბარსას" დუბლი. ის კოშმარული შეხვედრა "რეკორდმაისტერმა" 8-2 მოიგო.
ტომას მიულერი, დიდი ალბათობით, დღესაც ძირითად შემადგენლობაში მოხვდება, კატალონიელთა მცველებმა კი მას დიდი ყურადღება უნდა მიაქციონ.
ამ სიახლეზე კომენტარები გათიშულია.
კომენტარები [ 7 ]