კუმანს ხუთი ფეხბურთელისთვის როლის მოფიქრება მოუწევს
ერთი კვირის წინ, რონალდ კუმანმა "ბარსელონას" შემადგენლობის სიღრმესთან დაკავშირებით უკმაყოფილება გამოთქვა: "31-32 მოთამაშესთან ერთად მუშაობა შეუძლებელია. მწვრთნელის კურსებზე ამას არ ასწავლიან. ეს წარმოუდგენელია", - თქვა ნიდერლანდელმა.
"ბლაუგრანამ" ანტუან გრიზმანის, ემერსონის, რეი მანაისა და მირალემ პიანიჩის გაშვებით გუნდი მნიშვნელოვნად გადაახალისა, თუმცა შემადგენლობა მაინც საკმაოდ ღრმაა. "
AS წერს, რომ "ბარსაში" ისეთი ფეხბურთელი ირიცხებიან, რომელთაც განსაზღვრული როლი არ აქვთ, კუმანმა კი ეს პრობლემა უნდა გადაჭრას. ესენი: ნეტუ, სამუელ უმტიტი, რიკი პუჩი, ალექს კოლიადო და ფილიპე კოუტინიო არიან. მათ ნაწილს წასვლა სურდა, თუმცა არ გამოუვიდათ. ნაწილი კი მწვრთნელის გეგმებში არ შედის, თუმცა ხელმძღვანელობა მხარს უჭერს. ასე რომ, 58 წლის სპეციალისტს მათთვის როლის მოფიქრებისთვის მუშაობა მოუწევს.
ნეტუ
ბრაზილიელი "ბარსელონაში" 2 სეზონის წინ გადავიდა და მუდმივად სათადარიგოთა სკამზე ჯდომა უწევდა, რის გამოც, წინა წელს წასვლა უკვე ცადა. ნეტუს "ბარსას" დატოვება გასულ ზაფხულშიც სურდა, თუმცა მისი მაღალი ხელფასის გამო, ეს არ გამოვიდა. მიმდინარე სეზონში ის კვლავ მარკ-ანდრე ტერ შტეგენის რეზერვი იქნება, რომელთანაც კარგი ურთიერთობა არ აქვს. ამასთან, 32 წლის ფეხბურთელის გუნდში ყოლა ინიაკი პენიასა და არნაუ ტენასის პროგრესს ხელს უშლის. ივარაუდება, რომ ზამთარში ნეტუს გასხვისება იგეგმება.
სამუელ უმტიტი
უმტიტი სეზონის საწყის ეტაპზე ფანებისგან ობსტრუქციის ობიექტი გახდა. ფრანგს ტრავმის გამო თითქმის ორი სეზონია, არ უთამაშია. ამასთან, გულშემატკივრები ლეო მესის წასვლაში ერთ-ერთ დამნაშავედ მასაც მიიჩნევდნენ მისი მაღალი ხელფასის გამო. 27 წლის უკანახაზელი ახლაც გუნდის ერთ-ერთი ყველაზე მაღალანაზღაურებადი ფეხბურთელია. დღეს გავრცელებული ინფორმაციით, სამუელმა ჟოან ლაპორტას, შეხვდრისას უთხრა, რომ კიდევ ერთი შანსის მიღება სურს, რაზეც პრეზიდენტისგან თანხმობა მიიღო. ხელმძღვანელობა ფრანგის სიტუაციას მწვრთნელსაც აუხსნის. თუ უმტიტი არ ითამაშებს, მისი გაშვებაც შეუძლებელი გახდება.
რიკი პუჩი
უმტიტის მსგავსად, ლაპორტა მხარს პუჩსაც უჭერს და მწვრთნელს ურჩევს, მას უფრო მეტი შანსი მისცეს. ახალგაზრდა ნახევარმცველი სტრატეგიულად მნიშვნელოვან ფეხბურთელად მიიჩნევა. ის, ბოლო წლებში, "ლა მასიას" ერთ-ერთი ყველაზე ნათელი წარმომადგენელია.
ალექს კოლიადო
კოლიადო იმედოვნებს, რომ "ბარსას" მესამე ცდაზე მაინც დატოვებს. ის თავდაპირველად "ბრიუგეში", შემდეგ კი "შეფილდში" გადასვლასთან იყო ახლოს, თუმცა ტრანსფერები ბოლო ეტაპზე ჩაიშალა. იმის გათვალისწინებით, რომ კლუბს ალექსი არც მთავარ და არც სარეზერვო გუნდში არ დაურეგისტრირებია, მას, სავარაუდოდ, ისეთ ქვეყანაში წასვლა მოუწევს, სადაც სატრანსფერო ფანჯარა ჯერ არ დახურულა. კუმანმა მკაფიოდ თქვა, რომ კოლიადოს იუსუფ დემირი ურჩევნია და ესპანელს დროს არ მისცემს.
ფილიპე კოუტინიო
კოუტინიოს სიტუაცია უმტიტის სიტუაციის მსგავსია. ტრავმის გამო, ბრაზილიელს დეკემბრის შემდეგ არ უთამაშია, თუმცა გუნდში ერთ-ერთი ყველაზე მაღალი ხელფასი აქვს. გულშემატკივრებმა ისიც გააკრიტიკეს. ფილიპე "ბარსას" ისტორიაში ყველაზე ძვირადღირებული შენაძენია, ამიტომ მისი ტრანსფერი მხოლოდ წარუმატებლად შეიძლება შეფასდეს. სხვებისგან განსხვავებით, კოუტინიოს რონალდ კუმანის ნდობა აქვს. ის ლა ლიგის ბოლო მატჩის განაცხადშიც მოხვდა. სავარაუდოდ, მიმდინარე სეზონში ნიდერლანდელი სპეციალისტი მას აქტიურად გამოიყენებს.
ამ სიახლეზე კომენტარები გათიშულია.
კომენტარები [ 13 ]