როგორი იქნება ბარსელონას შემადგენლობა მომდევნო სეზონში | Sport

კატალონიური გამოცემა Sport 2021/22 წლების სეზონში "ბარსელონას" სავარაუდო ძირითად შემადგენლობასა და ყველა პოზიციაზე პოტენციურ ალტერნატივებს აქვეყნებს. 

Sport მოიაზრებს, რომ რონალდ კუმანი 4-3-3 ფორმაციითა და შემდეგი შემადგენლობით ითამაშებს:

ტერ შტეგენი; ალბა, არაუხო, პიკე, დესტი; პედრი, ბუსკეტსი, დე იონგი; ფატი, დეპაი, გრიზმანი.

ცენტრალურ დაცვაში რონალდ არაუხო სასტარტო შემადგენლობაში კლემან ლანგლესა და სამუელ უმტიტის ადგილს დაიკავებს, რომელთაც აშკარა რეგრესი აქვთ. ლანგლე ტრავმირებულია, უმტიტის კლუბიდან წასვლა კი მხოლოდ დროის ამბავია. ამავე პოზიციაზე შემადგენლობაში ადგილისთვის იბრძოლებენ ერიკ გარსია და ოსკარ მინგესაც.

ჟორდი ალბას კონკურენტი ახალგაზრდული გუნდიდან დაწინაურებული ალეხანდრო ბალდეა, სერჟინიო დესტს კი კონკურენციას ახალწვეული ემერსონი გაუწევს. 

ნახევარდაცვაში ისევ ტრადიციული სამეულია. მირალემ პიანიჩი, რომელმაც კლუბი წესით მალე უნდა დატოვოს, სათადარიგოთა სკამზე მოიაზრება, ისევე, როგორც ფილიპე კოუტინიო, რიკი პუჩი და სერჟი რობერტო. მათთან ერთად არიან აკადემიის ფეხბურთელები - გავი და ნიკო. 

ცენტრფორვარდის პოზიციაზე სასტარტოში ძირითადად მემფის დეპაი იქნება, რომელსაც ხშირად სერხიო აგუერო შეცვლის. მარტინ ბრეითუეიტი რონალდ კუმანისთვის მხოლოდ მესამე ვარიანტია. 

შეტევის მარცხენა ფლანგზე ანსუ ფატის კონკურენტი უსმან დემბელე იქნება (ეს მხოლოდ სეზონის მეორე ნაწილში, რადგან ჯერჯერობით ორივე ტრავმირებულია), მარჯვნივ კი ანტუან გრიზმანს კონკურენციას იუსუფ დემირი და ალექს კოლიადო გაუწევენ. 

"ბარსა" ახალი სეზონის პირველ ოფიციალურ მატჩს 15 აგვისტოს, "სოსიედადის" წინააღმდეგ გამართავს.