ბარსელონა ლა ლიგისათვის მზადაა!
"ბარსელონამ" პრესეზონი, შეიძლება ითქვას, წარმატებით ჩაატარა. კატალონიური კლუბი ოფიციალური მატჩების ჩატარებას კვირიდან დაიწყებს - 15 აგვისტოს "ბლაურანა" "რეალ სოსიედადს" უმასპინძლებს.
რონალდ კუმანის ბიჭებმა პრესეზონის პირველი ორი შეხვედრა სახლში, "იოჰან კრუიფზე" გამართეს. კლუბმა "ჟიმნასტიკთან" ანგარიშით, 4-0 იმარჯვა, ხოლო "ჟირონასთან - 3-1. აღსანიშნავია, რომ პირველი მატჩის მეორე ტაიმში მოედანზე რეი მანაი გამოვიდა, რომელმაც ძირითად გუნდთან ერთად სადებიუტო გოლები (თანაც, ჰეთ-თრიქი) გაიტანა.
შემდეგი ეტაპი გერმანიასა და ავსტრიაში გამგზავრება იყო. გერმანიაში ყოფნისას "ლურჯ-ბროწეულისფერები" ბუნდესლიგის გუნდს, "შტუტგარტს" დაუპირისპირდნენ და მეტოქე ანგარიშით, 3-0 დაამარცხეს. გოლებით თავი მემფის დეპაიმ, დემირმა და რიკი პუჩიმ გამოიჩინეს.
აღნიშნულის შემდეგ გუნდი მეზობელ ავსტრიაში გადაბარგდა, სადაც "ზალცბურგს" დაუპირისპირდა. შეხვედრა მასპინძელთა გამარჯვებით (2-1) დასრულდა.
აწ უკვე ოფიციალურად ლეო მესის გარეშე დარჩენილმა გუნდმა ბოლო გამოცდა გამპერის თასზე,"იუვენტუსის" წინააღმდეგ ჩააბარა. ერთი შეხედვით მარტივად ჩამოწერილმა "ბარსამ" ტურინელები ანგარიშით 3-0 დაამარცხა და პრესეზონი კარგ ნოტზე დაასრულა.
აღსანიშნავია ის ფაქტი, რომ პრესეზონის განმავლობაში მოედანზე 347 წუთი დაჰყო სერჟინიო დესტმა, რაც გუნდში საუკეთესო შედეგია. მას ნეტუ და მემფის დეპაი მოჰყვებიან. საუკეთესო მეგოლე 24 წლის რეი მანაი გახდა, რომელმაც 4 გოლის გატანა მოახერხა. საუკეთესო მეპასე კი, 2 ასისტით, ანტუან გრიზმანია.
კვირას "ბარსელონელებისათვის" ნამდვილი გამოცდა იწყება და თანაც, 29 803 გულშემატკივრის წინაშე!
ამ სიახლეზე კომენტარები გათიშულია.
კომენტარები [ 16 ]