ლეგენდების ელ კლასიკო რეალის გამარჯვებით დასრულდა

რამდენიმე წუთის წინ, ისრაელში "ბარსელონასა" და "რეალის" ლეგენდების მონაწილეობით გამართული ამხანაგური შეხვედრა "ბლანკოსის" გამარჯვებით, ანგარიშით 3-2, დასრულდა.

ანგარიში 28-ე წუთზე გაიხსნა, როდესაც რონალდინიომ თერთმეტმეტრიანი დარტყმა ზუსტად შეასრულა. პირველ ტაიმში მეტი გოლი აღარ გასულა.

მეორე ტაიმის სტარტზე პედრო მუნიტისმა და ალფონსო პერესმა "რეალი" დააწინაურეს. მე-60 წუთზე წონასწორობა, რივალდოს პასით, ჟოფრე მატეუმ აღადგინა.

70-ე წუთზე მატჩის გადამწყვეტი გოლი გავიდა - "ბლაუგრანას" კარის აღება რუბენ დე ლა რედმა შეძლო.

ლეგენდებმა ორი 40-წუთიანი ტაიმი ითამაშეს. აღსანიშნავია, რომ ტრიბუნებზე მყოფი "ბარსას" გულშემატკივარი ლუიშ ფიგუს მიერ ბურთის მიღებას სტვენით ხვდებოდა.