რეალმა ქულები დაკარგა - ლა ლიგისთვის ბრძოლა გრძელდება!
ცოტა ხნის წინ, მადრიდის "რეალსა" და "სევილიას" შორის "სანტიაგო ბერნაბეუზე" გამართული უმნიშვნელოვანესი შეხვედრა, ანგარიშით, 2-2 დასრულდა.
აღნიშნულ მატჩში ანგარიში ანდალუსიელებმა, ფერნანდოს გოლით გახსნეს და პირველი ტაიმიც მოიგეს. მეორე ნახევარში ზინედინ ზიდანის გუნდმა წონასწორობის აღდგენა, ტონი კროოსის შესანიშნავი პასის შემდეგ, მარკო ასენსიოს დარტყმით მოახერხა, თუმცა მალევე მასპინძელთა კარში პენალტი დაინიშნა, რომელიც "ბარსას" ყოფილმა ფეხბურთელმა, ივან რაკიტიჩმა ზუსტად შეასრულა.
თითქოს ყველაფერი იქითკენ მიდიოდა, რომ ხულენ ლოპეტეგის შეგირდები ამ დაპირისპირებას მოიგებდნენ, მაგრამ მსაჯის მიერ კომპენსირებულ დროში ტონი კროოსმა შორიდან გაისროლა, ბურთი კი რიკოშეტის წყალობით ბონოს კარში აღმოჩნდა - საბოლოოდ, გუნდებმა ქულები გაიყვეს.
ამ შედეგის შემდეგ, "ბლანკოსმა" 75 ქულა მოაგროვა და მეორე ადგილზე გადავიდა, ამდენივე ქულით "ბარსელონა" მესამეზე იმყოფება, ხოლო პირველ პოზიციას მადრიდის "ატლეტიკო" 77 ქულით იკავებს.
შესაბამისად, "ლურჯ-ბროწეულისფერები" იმედოვნებენ, რომ მომდევნო ტურში კონკურენტები ქულებს დაკარგავენ, თავად კი "ლევანტეს" დაამარცხებენ. წინ 3 რაუნდი რჩება, "ბლაუგრანა" კი მადრიდულ გუნდებზეა დამოკიდებული.
ცნობისთვის, "ბარსელონამ" ყველა შემთხვევაში ყველაზე მეტი ქულა უნდა მოიპოვოს, რათა ჩემპიონი გახდეს, რადგან ურთიერთშეხვედრებში კატალონიურ გრანდს "ატლეტიკომაც" და "რეალმაც" აჯობეს.
ამ სიახლეზე კომენტარები გათიშულია.
კომენტარები [ 16 ]