რონალდ კუმანი "ხეტაფესთან" მატჩის შემდეგ
ლა ლიგის 31-ე ტურში მოპოვებული გამარჯვების მიუხედავად, რონალდ კუმანს დღევანდელ დაპირისპირებაში ნერვიულობის საბაბი მაინც ჰქონდა.
გარდა იმისა, რომ გუნდმა ყველაზე ნაკლებად გამტანი გუნდისაგან 2 გოლი მიიღო, ნიდერლანდელი სპეციალისტი ოსკარ მინგესას ძალიან გაუბრაზდა.
მაშინ, როდესაც ანგარიში 3-2 იყო, ოსკარმა შეტევაში წასვლა გადაწყვიტა, რაზეც მწვრთნელმა უსაყვედურა. ამაზე ახალგაზრდა მცველმა უკმაყოფილება გამოხატა და საპასუხოდ კუმანისაგან სათადარიგოთა სკამზე განწესებაც მიიღო.
მატჩის შემდეგ ნიდერლანდელმა სპეცილისტმა შეხვედრა მიმოიხილა და ნახსენები ეპიზოდიც განმარტა.
"ეს კარგი შედეგია. პირველ ნახევარში კარგად ვთამაშობდით. მეორე ტაიმში ნაკლებად კონცენტრირებულნი გამოვედით, დავაგდეთ თამაშის ტემპი და შეხვედრაც უსიამოვნოდ გავირთულეთ. როდესაც მსგავსი რამ ხდება, შეხვედრა ყოველთვის ჩვენს საწინააღმდეგოდ წარიმართება და ამიტომ ასეთ სიტუაციებთან გამკლავება უნდა ვისწავლოთ."
"მინგესას ეპიზოდში ოდნავ გადავამეტე, ის მშვენიერ სეზონს ატარებს. მან უნდა ისწავლოს, რომ როდესაც "ბარსას" ფეხბურთელი ხარ, ყოველ შეხვედრაში ყურადღებით უნდა ითამაშო."
"ოსკარის შეცვლა ჩემი სიბრაზით არ იყო განპირობებული. ამ ცვლილების შედეგად ფრენკი მარჯვნივ გადავიდა და უმტიტისაც სათამაშო დრო მიეცა. მინგესას მატჩის შემდეგ ვესაუბრე. მასთან პრობლემა არ მაქვს და არც გაბრაზებული ვარ."
"მეორე მხრივ, ვხვდები, თუ რატომ მოვდუნდით მეორე ტაიმში. პირველი ნახევრის შემდეგ 3-1-ს ვიგებდით, "ხეტაფეც" არ გვაწუხებდა. თუმცა, შემდეგ უყურადღებოდ ვითამაშეთ, პენალტი მივიღეთ, რამაც ყველაფერი გაართულა."
"მესი? ეს გადაწყვეტილება მხოლოდ ლეოს მისაღები იყო. ის ზოგჯერ კარგავს კონცენტრაციას, მაგრამ ამას ვერ ვამჩნევთ. ის საუკეთესოა და იმედია, ჩვენთან კიდევ ბევრი წლის განმავლობაში დარჩება."
"ბეუსკეტსი? ის ძალიან ჭკვიანი და გუნდისათვის მნიშვნელოვანი ფეხბურთელია. პირველ რიგში იმის გამო, თუ როგორი სათამაშო სტილიც აქვს. 3 ცენტრალურ მცველთან ერთად თამაშმა მას საკუთარი შესაძლებლობების გამოყენების საშუალება მისცა."
"ვიცი, რომ შემტევ ხაზში უკვე ბევრი არჩევანი აღარ გვაქვს. იმედია, დემბელე მომდევნო უიქენდისათვის მზად იქნება. ბრეითუეიტი გამოჯანმრთელებას ვერ მოასწრებს. "ვილიარეალი" ძლიერი გუნდია, ის ევროპა ლიგაზეც იბრძვის. რთული თამაში იქნება, ისევე როგორც დარჩენილი მატჩები."
რონალდ კუმანის "ბარსას" კიდევ 7 მატჩი დარჩა სათამაშო. თუ კატალონიელებს სურთ, რომ მხოლოდ საკუთარ თავზე იყვნენ დამოკიდებულნი, ყველა მატჩში გამარჯვება სჭირდებათ.
ამ სიახლეზე კომენტარები გათიშულია.
კომენტარები [ 10 ]