ერთი დღე "ბარსას" ისტორიაში - 16 მარტი

წარმოგიდგენთ რუბრიკას "ერთი დღე "ბარსელონას" ისტორიაში". ამჯერად შემოგთავაზებთ "ბარსელონასთან "დაკავშირებულ მოვლენებს, რომლებიც 16 მარტს მოხდა.

თამაშები

16 მარტს "ბარსელონას" 20-ჯერ უთამაშია. კატალონიელებმა 10 მატჩი მოიგეს, 8 ფრედ დაასრულეს და 2 წააგეს.

1930 წელი

დაიბადა "ბარსელონას" ყოფილი თავდამსხმელი რამონ ალბერტო ვილიავერდე. 1954-1963 წლებში მან "ბლაუგრანას" მაისურით 223 თამაში ჩაატარა და 74 გოლი გაიტანა. ვილიავერდემ 3-ჯერ ესპანეთის თასი, 2-ჯერ ბაზრობათა თასი (ამჟამინდელი ევროპა ლიგა) და 2-ჯერ ესპანეთის ჩემპიონატი მოიგო.

1947 წელი

ლა ლიგის საშინაო დერბიში "ბარსელონამ" "ესპანიოლი" 5-0 გაანადგურა. 4 გოლი ესკოლამ გაიტანა, ხოლო ერთი ბრავომ.

1952 წელი

ლა ლიგის საშინაო შეხვედრაში "ბარსელონამ" "რასინგი" 7-1 გაანადგურა. გოლები მორენომ, ვილამ (2), კუბალამ (2) და სესარმა (2) გაიტანეს.

1997 წელი

ლა ლიგაში "ლოგრონიესთან" სტუმრად გამართულ შეხვედრაში "ბარსელონას" პირველი ზუსტი დარტყმის განსახორციელებლად თითქმის 45 წუთი დასჭირდა. საბოლოოდ "ბლაუგრანამ" ამუნიკეს მიერ 82-ე წუთზე გატანილი ერთადერთი გოლით მოიგო.

2002 წელი

ჩავიმ "ელ კლასიკოში" თავისი პირველი გოლი გაიტანა, "კამპ ნოუზე" გამართული თამაში კი 1-1 დასრულდა. სტუმართაგან გოლი ზიდანმა გაიტანა.

2014 წელი

"ოსასუნასთან" 7-0 მოგებულ შეხვედრაში ლეო მესიმ პაულინო ალკანტარას რეკორდი დაამხო და ის კლუბის ისტორიაში საუკეთესო ბომბარდირი გახდა.