ერთი დღე "ბარსას" ისტორიაში - 14 მარტი

წარმოგიდგენთ რუბრიკას "ერთი დღე "ბარსელონას" ისტორიაში". ამჯერად შემოგთავაზებთ "ბარსელონასთან "დაკავშირებულ მოვლენებს, რომლებიც 14 მარტს მოხდა.

თამაშები

14 მარტს "ბარსელონას" 12-ჯერ უთამაშია. კატალონიელებმა 9 მატჩი მოიგეს, 2 ფრედ დაასრულეს და 1 წააგეს.

1909 წელი

გაიხსნა "ბარსელონას" სტადიონი "კამპ დე ლა ინდუსტრია". ამ სტადიონზე გუნდი 1922 წლამდე თამაშობდა, სანამ "კამპ დე ლეს კორტსზე" გადავიდოდა.

1926 წელი

ესპანეთის თასზე "სარაგოსასთან" გამართულ შეხვედრაში "ბარსელონამ" 7-0 მოიგო. გოლები მუსტეროსმა (4), არნაუმ, ალკანტარამ და კურულიამ გაიტანეს.

1943 წელი

ლა ლიგის საშინაო შეხვედრაში "ბარსელონამ" "ოვიედო" 6-2 დაამარცხა. მასპინძელთაგან გოლები მარტინმა (3), სესარმა (2) და სოსპედრამ გაიტანეს.

1987 წელი

"ბეტისთან" საკუთარ კედლებში ანგარიშით 2-0 მოგებულ შეხვედრაში ანდონი სუბისარეტამ ლა ლიგაში მე-200 თამაში ჩაატარა.

1999 წელი

"ბარსელონამ" "ესპანიოლი" "კამ ნოუზე" გამართულ დერბიში 3-0 გაანადგურა. გოლები რივალდომ (2) და კლუივერტმა გაიტანეს. რივალდოსთვის ეს ლა ლიგაში ჩატარებული მე-100 თამაში იყო.

2014 წელი

"ბარსელონას" საკალათბურთო გუნდის ლეგენდა ხუან კარლოს ნავარო ევროლიგის რეკორდსმენი გახდა ჩატარებული თამაშებისა და ნათამაშები წუთების მიხედვით. "ბარსელონამ" იმ დროისთვის მოქმედი ჩემპიონი "ოლიმპიაკოსი" 70-58 დაამარცხა და ტურნირის ტოპ 16-ში მოგება-წაგების ბალანსი 10-0 გახადა. ეს იყო ტოპ 16-ში "ბლაუგრანას" ზედიზედ 22-ე და საკუთარ კედლებში ზედიზედ 30-ე მოგება, რაც ტურნირის ყველა დროის რეკორდია.

2015 წელი

"ეიბართან" სტუმრად 2-0 მოგებულ შეხვედრაში ჩავიმ "ბარსელონას" მაისურით 750-ე თამაში ჩაატარა. შეხვედრის ორივე გოლი ლეო მესიმ გაიტანა.

2018 წელი

ჩემპიონთა ლიგის 1/8-ფინალის განმეორებით მატჩში "ბარსელონამ" "ჩელსი" 3-0 გაანადგურა. უსმან დემბელემ ჩემპიონთა ლიგაზე "ბარსას" მაისურით პირველი გოლი გაიტანა, ხოლო ლეო მესიმ - მე-100.