კუმანს ზამთრის სატრანსფერო ფანჯარაზე ფეხბურთელების გაშვება არ უნდა
მოგეხსენებათ, მიმდინარე სეზონში რიკი პუჩისა და ჟუნიორ ფირპოს სათამაშო დროის დეფიციტის გათვალისწინებით, მათ წასვლაზე ცნობები აქტიურად ვრცელდებოდა.
ახლა კი, Diario Sport-ის ჟურნალისტის, ლუის მიგელსანსის ინფორმაციით, „ბარსელონას“ თავკაცი, რონალდ კუმანი ზამთრის სატრანსფერო ფანჯარაზე არცერთი ფეხბურთელის გაშვებას არ აპირებს.
შესაბამისად, არც პუჩი და არც ფირპო გუნდს იჯარის წესით არ დატოვებენ. რაც შეეხება მატეუს ფერნანდესს, რომელიც ნიდერლანდელის გეგმებში არ შედის, - ბრაზილიელი ერთადერთი მოთამაშეა, რომელიც, შესაძლოა, გაანათხოვრონ.
როგორც წყარო იტყობინება, ზემოხსენებული გადაწყვეტილება „ლურჯ-ბროწეულისფერთა“ რთულმა კალენდარმა განაპირობა. ამის გათვალისწინებით, 57 წლის სპეციალისტს როტაციისთვის ბევრი ფეხბურთელი სჭირდება.
შეგახსენებთ, ადრე ვრცელებოდა ცნობები, რომ ჟუნიორის იჯარით აყვანა „მილანს“ სურდა, თუმცა შეთანხმება არ შედგა. მიუხედავად იმისა, რომ ფირპო და პუჩი ძირითადი შემადგენლობის წევრები არ არიან, მათ კუმანი ალბათ სათასო დაპირისპირებებში გამოიყენებს. მაგალითისთვის, ორივე მათგანმა „კორნელიასთან“ კოპა დელ რეიზე გამართული მატჩი სასტარტოდან დაიწყო.
ამ სიახლეზე კომენტარები გათიშულია.
კომენტარები [ 13 ]