"ბარსელონას" ფეხბურთელი, რომელიც 7 ენაზე საუბრობს
თანამედროვე სამყაროში ორი ან სამი ენა ბევრმა ადამიანმა იცის. არცთუ ცოტაა ისეთი, ვინც 4 ენას ფლობს. უფრო ნაკლები 5 ენაზე ლაპარაკობს. აი "ბარსელონას" ბოსნიელი ნახევარმცველი მირალემ პიანიჩი კი 7 ენაზე საუბრობს.
არსებობენ ფეხბურთელები, რომლებსაც ძალიან ბევრ გუნდში აქვთ ნათამაშები, მაგრამ 7 ენა მათთვისაც კი ბევრია. პიანიჩის შემთხვევაში ბევრი ენის ათვისება შესაძლებელი ჯერ კიდევ ბავშვობის წლებში გახდა.
მირალემი წარმოშობით ბოსნიიდანაა. 1990 წელს დაბადებულმა მომავალმა ფეხბურთელმა მშობლიური ენა ისწავლა, 2 წლის შემდეგ დაწყებული ბოსნიის ომის გამო კი მისი ოჯახი იძულებული გახდა საცხოვრებლად ლუქსემბურგში გადასულიყო. ლუქსემბურგში სკოლებში სწავლა სამ ენაზე მიმდინარეობს - ლუქსემბურგულად, გერმანულად და ფრანგულად. ასევე სავალდებულო საგანია ინგლისური ენის შესწავლა. ასე დაეუფლა მირალემ პიანიჩი ჯერ კიდევ სკოლის ასაკში 4 უცხო ენას. მათ შორისაა ლუქსემბურგული, ენა, რომელზეც მხოლოდ 600 ათასი ადამიანი ლაპარაკობს.
2004-2011 წლებში "მეცსა" და "ლიონში" თამაშის დროს მირალემმა ფრანგული ენა დახვეწა, 2011 წელს კი იტალიაში გადავიდა, სადაც 9 წელი თამაშობდა. ასე ისწავლა მან კიდევ ერთი, რიგით მეექვსე ენა - იტალიური.
2020 წლის გაზაფხულიდან მირალემ პიანიჩი "ბარსელონაში" თამაშობს, ეს კი იმას ნიშნავს, რომ 30 წლის შუახაზელმა რაღაც დონეზე უკვე ესპანურიც იცის.
იქნებ კატალონიურიც შეისწავლოს. სადაც 7, იქაც 8.
ამ სიახლეზე კომენტარები გათიშულია.
კომენტარები [ 9 ]