ხესუს ხილ მანსანოს "ჰეთ-თრიქი"
გუშინ, ესპანეთის სუპერ თასის ფინალში, შეხვედრის მთავარმა მსაჯმა, ხესუს ხილ მანსანომ, ლიონელ მესი მოედნიდან გააძევა.
36 წლის არბიტრმა, ერთგვარი, "ჰეთ-თრიქი" შეასრულა. მას, კარიერის განმავლობაში, უკვე მოედნიდან გაძევებული ჰყავს "ბარსელონას" 3 გამორჩეული თავდამსხმელი: ლიონელ მესი, ლუის სუარესი და ნეიმარი.
2017 წლის 7 თებერვალს, კოპა დელ რეის ნახევარფინალის განმეორებით შეხვედრაში, "ატლეტიკოს" წინააღმდეგ, ურუგვაელ შემტევს მანსანომ წითელი ბარათი მატჩის კომპენსირებულ დროში უჩვენა და "ბარსა" მოედანზე 9 კაცით დატოვა. მანამდე, მან სერჟი რობერტოს გაძევებაც მოასწრო.
საბოლოოდ, გუნდმა ფინალში გასვლა და იქ გამარჯვებაც მოახერხა. აღსანიშნავია, რომ დარღვევა, რომლის გამოც სუარესს მოედნის დატოვებამ მოუწია, გუშინდელი შემთხვევის მსგავსია.
აქედან, 2 თვეში, მანსანოსგან წითელი ბარათი უკვე ნეიმარმა მიიღო. ლა ლიგის 31-ე ტურში, "მალაგასთან" გასვლითი შეხვედრის 65-ე წუთზე, ბრაზილიელმა უხეში თამაშისთვის მეორე ყვითელი ბარათი დაიმსახურა.
მოედნიდან გასვლისას, ნეიმარმა პროტესტი ირონიული აპლოდისმენტებით გამოხატა, რის გამოც, 3-მატჩიანი დისკვალიფიკაციით დასაჯეს და უმნიშვნელოვანესი "ელ კლასიკო" გამოატოვებინეს. იმ მატჩში, "ბარსამ" "სანტიაგო ბერნაბეუზე", ლეო მესის ლეგენდარული გოლის წყალობით, გამარჯვება იზეიმა.
ამ სიახლეზე კომენტარები გათიშულია.
კომენტარები [ 9 ]