5 ფეხბურთელი, რომელიც შესაძლოა, იანვარში კლუბმა გაყიდოს
2020 წელს, COVID-19-ის პანდემიის გამო, "ბარსელონამ" საგრძნობი ფინანსური ზარალი განიცადა, რისთვისაც კლუბმა, შესაძლოა, ფეხბურთელების გაყიდვა გადაწყვიტოს.
აქვე უნდა აღვნიშნოთ, რომ "ბარსას" ამჟამინდელ, დროებით ხელმძღვანელობას მოთამაშეების გასხვისების უფლება არ აქვს, თუმცა ბორდის წევრებს მოლაპარაკებების გამართვა და შემდეგ ახალი მესვეურებისთვის (არჩევნები 24 იანვარსაა ჩანიშნული) გადაცემა შეუძლიათ.
ახლა კი, მადრიდული Marca გვთავაზობს იმ 5 ფეხბურთელს, რომლებსაც, შესაძლოა, კრიზისის ფონზე, გუნდის დატოვება მოუხდეთ.
უსმან დემბელე
კატალონიური კარიერის განმავალობაში მიღებულმა უამრავმა ტრავმამ ფრანგს პოტენციალის ბოლომდე გამოყენების საშუალება არ მისცა. "ბლაუგრანამ" წარსულში მისი გაყიდვა უკვე სცადა და, მოთმინების ამოწურვის შემთხვევაში, შესაძლოა მსგავსი მცდელობა იანვარშიც ვიხილოთ. Transfermarkt-ის მიხედვით 23 წლის შემტევი 50 მილიონ ევროდაა შეფასებული. მსურველი კლუბების გამოჩენის შემთხვევაში, "ბარსა" შესაძლოა ამ თანხის სანაცვლოდ მას შეელიოს.
სამუელ უმტიტი
კიდევ ერთი ფეხბურთელი, რომელიც ტრავმებისკენაა მიდრეკილი. როგორც ჩანს, ფრანგი უკანახაზელი რონალდ კუმანის გეგმებში არ შედის, ვინაიდან, ჟერარ პიკეს ხანგრძლივი უქმობის პირბებშიც კი, მას სათამაშო პრაქტიკა არ აქვს. Transfermarkt-ი წარმოშობით კამერუნელ მცველს 12 მილიონ ევროდ აფასებს. თანხის სიმცირის მიუხედავად, ლუის სუარესის უფასოდ გაშვების ფონზე, ახალი პრეზიდენტისთვის ნებისმიერი სარგებელი მისასალმებელი იქნება.
რიკი პუჩი
"ლა მასიას" მიერ აღზრდილ უნიჭიერეს ნახევარმცველს კლუბის ამჟამინდელი თავკაცი არ ენდობა და, შესაბამისად, იგი ხშირად სათადარიგოთა სკამზე გვევლინება. მიმდინარე სეზონში 21 წლის შუახაზელმა 5 მატჩში მოედანზე ჯამში მხოლოდ 78 წუთი დაჰყო, რამაც, შესაძლოა, ზამთარში მისი წასვლა გამოიწვიოს. Transfermarkt-ზე კატალონიელი 20 მილიონ ევროდაა შეფასებული. "ბლაუგრანამ" შესაძლებელია მისი იჯარით გაშვების ვარიანტი განიხილოს ან გაყიდოს და გამოსყიდვის უფლება დაიტოვოს.
ჟუნიორ ფირპო
2019 წელს წარმოშობით დომენიკელის შეძენის შემდეგ, მას ჟორდი ალბას მემკვიდრედ მიიჩნევდნენ. მაგრამ, მიღებული შანსების მიუხედავად, 24 წლის ფლანგელმა თავის გამოჩენა ვერ შეძლო. ფირპოს სატრანსფერო ღირებულება 14 მილიონ ევროს შეადგენს. "ლურჯ-ბროწეულისფერებმა", შესაძლოა, იგი იანვარშივე გაასხვისონ.
კარლეს ალენია
კატალონიელთა აკადემიის კიდევ ერთი პროდუქტი, რომელსაც, ნახევარდაცვაში არსებული კონკურენციიდან გამომდინარე, სათამაშო დრო არ ეძლევა. როგორც ჩანს, ნიდერლანდელი სპეციალისტი იმედებს არც მასზე ამყარებს. Transfermarkt-ზე ალენიას სატრანსფერო ღირებულებად 18 მილიონი ევრო გვხვდება, მაგრამ, ამჟამინდელი სიტუაციის ფონზე, ამ თანხის მიღება, თითქმის, წარმოუდგენელია.
ამ სიახლეზე კომენტარები გათიშულია.
კომენტარები [ 18 ]