ალავესი-ბარსელონა: რონალდ კუმანი მატჩის წინ

"ბარსელონას" ნიდერლანდელმა მთავარმა მწვრთნელმა, რონალდ კუმანმა, ლა ლიგის მე-8 ტურის წინ, ჟურნალისტების კითხვებს უპასუხა.

"ალავესი"

"როგორც ყველა ჩვენი ოპონენტი, ჩვენ ჩვენს თამაშს ვაანალიზებთ. მთავარია, ფეხბურთელებს სწორად მივაწოდოთ ინფორმაცია. ისეთივე მაღალ ტემპში უნდა ვითამაშოთ, როგორც ამას აქამდე ვაკეთებდით".

ძირითადი შემადგენლობა

"შემადგენლობის შერჩევისას ფიზიკურ ასპექტსაც უნდა მიაქციო ყურადღება. შეგვიძლია ვთქვათ, რომ გუნდი უფრო და უფრო იზრდება. "იუვენტუსთან" თამაში, თითქმის, იდეალური იყო, თუმცა ხელიდან ბევრი საგოლე მომენტი გავუშვით, მაგრამ ეს არის გუნდი, რომელმაც იცის თუ როგორ იპოვოს სივრცე. შესაძლოა გარკვეული ცვლილებები განხორციელდეს, რადგან თერთმეტზე მეტი ფეხბურთელი გვყავს".

ტერ შტეგენი

"გუშინ, მან გუნდთან ერთად ვარჯიში დაიწყო, თავს კარგად გრძნობს, თუმცა დრო კიდევ სჭირდება. რამდენიმე სავარჯიშო სესიის შემდეგ იგი ფიზიკურად ბოლომდე მზად იქნება".

უმტიტი

"ამ მომენტისთვის, სათამაშოდ მზად არაა. დღეს, მან ვარჯიშის გარკვეული ნაწილი შეასრულა, ვარჯიშები სრულად უნდა ჩაატაროს. ამისთვის, კიდევ რამდენიმე დღე დასჭირდება. მიხარია, რომ გუნდთან ერთადაა".

პედრი

"პედრი ძალიან თავმდაბალი ბიჭია. ის, რომ პრესა მასზე ამდენს საუბრობს, ნორმალურია, რადგან მან 17 წლის ასაკში ჯერ პირველ "კლასიკოში", შემდეგ კი "იუვენტუსთან" ითამაშა, თანაც ასე კარგად. იგი ძალიან თავმდაბალია და ყველაფერს რეალურად უყურებს, ასეც რომ არ იყოს, ამაში ჩვენ დავეხმარებით. იგი თამაშით სიამოვნებას იღებს, ასევე, თანაგუნდელების დახმარებით, მოედანზე ბრწყინავს".

პრეზიდენტის პოსტი

"არ ვიცი. გადაწყვეტილებას მე არ ვიღებ. მე მწვრთნელი ვარ და გუნდის განვითარებისთვის, სასურველი შედეგების მიღწევისა და ტიტულების მოსაგებად ვმუშაობ. ამას აკეთებენ მწვრთნელი და ფეხბურთელები. არჩევნებამდე კანდიდატები თავიანთი პროექტების შესახებ ისაუბრებენ. დაველოდოთ, ვინ გახდება პრეზიდენტი".

დემბელე

"მის თამაშზე გავლენას ტრავმები ახდენდნენ, ახლა კი უკეთეს ფიზიკურ ფორმაშია. იგი კრეატიული და ძალიან სწრაფია, ორივე ფლანგზე თამაშობს, გუნდს სჭირდება ფეხბურთელები, რომელთაც ერთი ერთზე ფეხბურთელის მოტყუება შეუძლიათ. მას განვითარების პერსპექტივა აქვს. მთავარია, კარგ ფიზიკურ ფორმაში იყოს".

ფატი

"მას ვურჩევდი, რომ მუშაობა გააგრძელოს. გუშინ, კონცენტრირებაზე ვისაუბრეთ. ზოგჯერ, ბურთის დაკარგვა კონცენტრირების ნაკლებობის ბრალია და არა - ფეხბურთელის შესაძლებლობების. ამიტომაც, უნდა მოუმატო. მას ჩვენ ყოველდღე ვეხმარებით. მას უდიდესი ტალანტი აქვს და ყოველდღიური პროგრესისთვის მზად უნდა ვიყოთ".

რიკი პუჩი განაცხადს მიღმა

"ეს ტექნიკური გადაწყვეტილებაა. რამდენიმე თამაშში 23 ფეხბურთელი გვყავდა, რაც, ჩემთვის, ბევრია. ოპტიმალურ ვარიანტს 20 ან 21 ფეხბურთელი წარმოადგენს. მირჩევნია, ის ფეხბურთელები მყავდეს, რომლებიც ძალიან ინტენსიურად ვარჯიშობენ და საჭიროების შემთხვევაში კარგ სათამაშო ფორმაში იქნებიან".

• რიკი პუჩი "ალავესთან" მატჩის განაცხადში ვერ მოხვდა

პედრის პოზიცია

"ვფიქრობ, მას სხვადასხვა პოზიციაზე თამაში შეუძლია, ეს გარკვეულ გარემოებებზეა დამოკიდებული. მაგალითად ავიღოთ "იუვენტუსთან" მატჩი: კუადრადოს წინააღმდეგ თამაში, დაცვაში ჟორდი ალბასთან ერთად ყოფნა, სად თამაშობს ლეო - წინ თუ 9-იანის უკან. პედრიმ აჩვენა, რომ რამდენიმე პოზიციაზე შეუძლია ითამაშოს".

პედრი და ფატი

"ისინი ერთმანეთისგან განსხვავებული მოთამაშეები არიან. ანსუ ძალიან კარგია, თუმცა ფოკუსირების მხრივ, მომატება შეუძლია. პედრის შემთხვევაში, არის სხვა ასპექტები, რომელიც მან უნდა გააუმჯობესოს. 17 და 18 წლის ფეხბურთელი ბოლომდე ჩამოყალიბებული არ არის".

მარადონა

"თავის ეპოქაში, იგი საუკეთესო იყო. ახლა, ჩემთვის, საუკეთესო ფეხბურთელი მესია. დღევანდელი და მაშინდელი ფეხბურთის შედარება რთულია, რადგან დღეს თამაში უფრო ინტენსიურია, ბევრი რამ შეიცვალა".

• დღეს დიეგო მარადონას დაბადების დღეა

არაუხო

"მას დიდი მომავალი აქვს, მცველისთვის ძალიან მნიშვნელოვანი თვისებები გააჩნია. მიუხედავად სიმაღლისა, საკმაოდ სწრაფია, ძლიერია, თავით კარგად თამაშობს. თუმცა გარკვეული ასპექტები უნდა გააუმჯობესოს, მაგალითად, შეტევების დაწყება და პირველი შეხება. მისით კმაყოფილი ვარ, იმედია, მალე დაგვიბრუნდება".

გრიზმანი

"ანტუანთან პრეტენზიები არ მაქვს, რადგან ვარჯიშებზე ბოლომდე იხარჯება. იმედია, ცოტა გაუმართლებს, რადგან წინა თამაშში ორი კარგი მომენტი შექმნა. გოლი მას შედარებით დაამშვიდებს".

უთამაშებელი ფეხბურთელები

"ახლა არც ისე ბევრი შესაძლებლობაა, რადგან გუნდი საკმაოდ ჩამოყალიბდა. ასეთ დროს, შენს შანსს უნდა დაელოდო და ყოველდღე, ვარჯიშებსა თუ "ბარსა B-ს" თამაშებში, აჩვენო, რომ მზად ხარ".

• კუმანის მიერ მივიწყებული ფეხბურთელები

ახალგაზრდები

"ყველას ვეუბნები, რომ მომენტით ისიამოვნონ. ყოველდღე არ ხდება, რომ ორი 17 წლის ფეხბურთელი ასეთ დონეზე თამაშობდეს. მათ ვურჩევდი, რომ იყვნენ თავმდაბლები და იშრომონ თავდაუზოგავად, რადგან კარიერა ძალიან დიდხანს გრძელდება. ფეხბურთელები, რომლებთანაც ეს ორი-სამი თვეა შეხება მაქვს, ძალიან კარგი ადამიანები არიან, მათ იციან თუ რა უნდა გააკეთონ".

მარჯვენა ფლანგი

"პირველ რიგში, სერჟინიო დესტის ტრანსფერით მოხარული ვარ. ის ახალგაზრდა ფეხბურთელია, რომელსაც ადაპტაცია სჭირდება. მან თავისი შესაძლებლობები "რეალთან" თამაშში აჩვენა, თუმცა სერჟი რობერტოს ვენდობით, რადგან მან სეზონის სტარტზე კარგად ითამაშა და არ არსებობს მიზეზი, რომლის გამოც, მან არ უნდა ითამაშოს. კონკურენცია ორივესთვის კარგია და შანსს ორივე მიიღებს. ამ პოზიციაზე ჯანსაღი კონკურენციაა".

"ალავესთან" მატჩი ხვალ, თბილისის დროით 23:55 საათზე, დაიწყება.