გრიზმანი "ბარსელონაში" ბედნიერი არაა | დიდიე დეშამი
საფრანგეთის ეროვნული ნაკრების მთავარი მწვრთნელი, დიდიე დეშამი, საკუთარი თანამემამულისა და "ბარსელონას" ფეხბურთელის, ანტუან გრიზმანის ამჟამინდელ მდგომარეობას ეხმაურება.
"ანტუანს ვესაუბრე, მოგვიანებით კი შევხვდები. დარწმუნებული ვარ, რომ ამ ვითარებაში იგი ბედნიერი არაა. ჩემი შეგირდების კლუბებში არსებულ სიტუაციაში არ ვერევი. ახლა, გრიზმანი "ბარსაში" მარჯვენა ფლანგზე თამაშობს.
ფრანგმა მითხრა, რომ ვერ გაიგო, თუ რატომ არ უწევს მას ცენტრში ასპარეზობა. ვფიქრობ, იგი ამ პოზიციაზე უფრო ეფექტურია, რადგან შესაძლებლობა აქვს, ბურთს ბევრჯერ შეეხოს. ასევე, შეუძლია, ნახევარდაცვას დაეხმაროს.
ფლანგზე ასპარეზობისას, ანტუანს ბურთის წაღებისა და მეტოქეების ჩამოცილების უნარი არ აქვს, მას ტყავის სფეროსთან ხშირად ყოფნა სჭირდება, რასაც, ჭკვიანური გადაადგილებების წყალობით, შედეგი მოაქვს.
ყველაფერი საუკეთესოდ უნდა გაკეთდეს. გრიზმანი არასდროს წუწუნებს, თუმცა მოთამაშე ბევრად პროდუქტიულია, როცა ჩვეულ პოზიციაზე ათამაშებენ", - აცხადებს დეშამი.
როგორც იცით, საკლუბო ფეხბურთი დროებით გვემშვიდობება, ვინაიდან, სანაკრებო პაუზა იწყება. შესაბამისად, 29 წლის თავდამსხმელი "ლურჯების" დამრიგებელს მალე შეხვდება.
შეგახსენებთ, ანტუან გრიზმანი "ბარსელონამ" 2019 წელს, 120 მილიონ ევროდ შეიძინა, მაგრამ სამწუხაროდ, ჯერჯერობით, იგი გაცემულ ავანსებს ვერ ამართლებს.
ამ სიახლეზე კომენტარები გათიშულია.
კომენტარები [ 5 ]