რეკორდები, რომლებსაც ლეო მესი "ბარსაში" დარჩენის შემთხვევაში დაამხობს
ლიონელ მესი კატალონიის "ბარსელონაში" 20 წლის წინ ჩაირიცხა და არაერთი ბრწყინვალე რეკორდი დაამხო. ახლა კი TyC Sports გვთავაზობს რამდენიმე შედეგს, რომელიც არგენტინელს ჯერ კიდევ არ დაუფიქსირებია:
ყველაზე მეტი მატჩი "ბარსაში"
ლეო, 731 შეხვედრით, კატალონიური გრანდის ისტორიაში მეორე პოზიციაზეა და მხოლოდ ლეგენდარულ ჩავი ერნანდესს ჩამორჩება, რომელმაც აქტივში 767 დაპირისპირება ჩაიწერა. როგორც ვხედავთ, ორ ლეგენდას შორის სხვაობა მხოლოდ 36 მატჩია და დარჩენის შემთხვევაში, "ლა პულგას" მისი დამხობა არ გაუჭირდება.
ყველაზე მეტი გოლი ერთი კლუბის მაისურით
ამჟამად, მესის "ლურჯ-ბროწეულისფერთა" მაისურით 634 გოლი აქვს გატანილი და პელეს რეკორდის დამხობამდე, რომელმაც "სანტოსის" რიგებში მეტოქეთა კარის ბადე 643-ჯერ შეარხია, 10 ბურთიღა აშორებს.
ყველაზე მეტი სეზონი "ბლაუგრანაში"
2004-2005 წლების სეზონიდან 2019-2020 წლების სეზონამდე, მესიმ 16 სეზონის ჩატარება მოასწრო (იმდენივე, რამდენიც ანდრეს ინიესტამ, მიგელიმ და სადუმიმ). ამგვარად, კიდევ ერთი წლით (მინიმუმ) დარჩენის შემთხვევაში, იგი კარლეს რეშაკსა და ჩავი ერნანდესს გაუთანაბრდება. ხსენებული მოთამაშეები, 17-17 სეზონით, პირველ ადგილს იკავებენ.
ყველაზე მეტი ტიტული ერთ კლუბში
ამ დროისთვის, არგენტინელმა ვარსკვლავმა "ბარსელონაში" 34 თასი მოიპოვა. მომდევნო სეზონში ლეოს შანსი ექნება, რაიან გიგზს გადაასწროს, რომელმაც "მანჩესტერ იუნაიტედის" შემადგენლობაში 36 ტიტული მოიგო.
ერთი კლუბის კაცი
მიუხედავად იმისა, რომ ეს ასპექტი რეკორდი არაა და ბევრი ფეხბურთელის დასახელება შეგვიძლია, რომელთაც საკუთარი კარიერა ერთ გუნდს მიუძღვნეს, სასიამოვნო იქნება, მათ ლეოც შეუერთდეს.
მსგავს მოთამაშეებს მიეკუთვნებიან: ლევ იაშინი (მოსკოვის "დინამო"), რიკარდო ბოკინი ("ინდეპენდიენტე"), რეინალდო მერლო ("რივერ პლეიტი"), ანტონიო რატინი ("ბოკა ხუნიორსი"), მიგელ ანხელ რუსო ("ესტუდიანტესი"), ომარ ასადი ("ველეს სარსფილდი"), პაოლო მალდინი ("მილანი"), გარი ნევილი, პოლ სქოულზი, რაიან გიგზი (სამივე "მანჩესტერ იუნაიტედი"), ფრანჩესკო ტოტი ("რომა") და კარლეს პუიოლი ("ბარსელონა").
ამ სიახლეზე კომენტარები გათიშულია.
კომენტარები [ 11 ]