კუმანი 31 ფეხბურთელით იწყებს
დღეს რონალდ კუმანი "ბარსელონას" მთავარ მწვრთნელად მუშაობას იწყებს. თბილისის დროი 19:30 საათზე ჰოლანდიელი სპეციალისტი პირველ ვარჯიშს ჩაატარებს.
ნაკრებში გამოძახების, კარანტინში ყოფნისა და დაუმორჩილებლობის გამო, კუმანის განკარგულებაში რამდენიმე ფეხბურთელი არ იქნება. თუმცა, საერთო ჯამში, "ბარსელონას" პირველ გუნდში, ამჟამად, 31 მოთამაშეა.
წინასასეზონო მზადების დროს კუმანს შემადგენლობის მნიშვნელოვნად გაცხრილვა მოუწევს. ჰოლანდიელმა სამუელ უმტიტის, ივან რაკიტიჩის, არტურო ვიდალისა და ლუის სუარესის ბედი უკვე გადაწყვიტა - მათ კარისკენ მიუთითეს. ჯერ კიდევ გაურკვეველია ჟუნიორ ფირპოს, ჟან-კლერ ტოდიბოს, მუსა ვაგეს, რაფინია ალკანტარასა და კარლეს ალენიას მომავალი. დიდი ალბათობით, "ბარსელონა" მათზე უარს იტყვის.
Mundo Deportivo-ს ინფორმაციით, ამჟამად "ბარსელონას" პირველ გუნდში შემდეგი ფეხბურთელები არიან:
3 მეკარე: მარკ-ანდრე ტერ შტეგენი, ნეტუ, ინიაკი პენია;
10 მცველი: სერჟი რობერტო, ნელსონ სემედუ, ჟერარ პიკე, კლემან ლანგლე, სამუელ უმტიტი, რონალდ არაუხო, ჟორდი ალბა, ჟუნიორ ფირპო, მუსა ვაგე, ჟან-კლერ ტოდიბო;
10 ნახევარმცველი: სერხიო ბუსკეტსი, ფრენკი დე იონგი, მირალემ პიანიჩი, რიკი პუჩი, პედრი, ივან რაკიტიჩი, არტურო ვიდალი, კარლეს ალენია, მატეუს ფერნანდესი, რაფინია ალკანტარა;
8 თავდამსხმელი: ლიონელ მესი, ლუის სუარესი, ანტუან გრიზმანი, ანსუ ფატი, უსმან დემბელე, ფილიპე კოუტინიო, ფრანსიშკუ ტრინკაუ, მარტინ ბრეითუეიტი.
ლა ლიგის წესების მიხედვით, განაცხადში პირველი გუნდის მაქსიმუმ 25 ფეხბურთელის შეყვანაა დაშვებული. ეს იმას ნიშნავს, რომ კუმანი მინიმუმ 6 მოთამაშეს შეელევა, მაგრამ ივარაუდება, რომ ეს რიცხვი უფრო დიდი იქნება.
ამ სიახლეზე კომენტარები გათიშულია.
კომენტარები [ 3 ]