რონალდ კუმანი კანდიდატთა სიას შეუერთდა
ნახევარ სეზონში გაცრუებული იმედების გამო, კატალონიის "ბარსელონა" კიკე სეტიენის პოსტიდან მოხსნას სერიოზულად განიხილავს. ესპანურ მედიას თუ დავუჯერებთ, ეს ნაბიჯი გარდაუვალი და უბრალოდ დროის საკითხია.
Mundo Deportivo-ს ინფორმაციით, "ლურჯ-ბროწეულისფერთა" სახელმძღვანელო შტაბი ახალი მწვრთნელის ძიებაშია. წყაროს ცნობით, ამ მომენტისათვის, მოწინავე პოზიციაზე რონალდ კუმანის კანდიდატურაც განიხილება.
ნიდერლანდელი კლუბსა და მის ფილოსოფიას იდეალურად იცნობს, ამას გარდა, აქვს ბევრი უნარი, რითაც გასახდელი ოთახის "დამორჩილებასა" და "აზრზე მოყვანას" შეძლებს.
რონალდს რომ "ბარსას" გაწვრთნა სურს, ეს საიდუმლო არავისთვისაა. გთავაზობთ მის 2 თვის წინანდელ ინტერვიუს:
"ყველამ იცის, რომ ერთ დღეს "ბლაუგრანას" გაწვრთნა ჩემი ოცნებაა. ერნესტო ვალვერდეს წასვლის შემდეგ თავკაცის პოსტი შემომთავაზეს, თუმცა ჩემი მოვალეობა ახლა ეროვნულ გუნდთან მაკავშირებს.
იმედი მაქვს, რომ კატალონიური კლუბის გაწვრთნის შანსი მომავალში კიდევ მომეცემა. ეს, რა თქმა უნდა, ჩემს კარიერაზე იქნება დამოკიდებული, რადგან "ბარსელონას" სადავეების ხელში ასაღებად, სულ მცირე, დიდი გამოცდილება გჭირდება", - აცხადებს კუმანი.
ამ სიახლეზე კომენტარები გათიშულია.
კომენტარები [ 5 ]