"ბარსელონა" ჩაგლარ სოიონჯუში 40 მილიონ ევროს იხდის - NTVSpor
მოგეხსენებათ, "ბარსელონა" ცენტრალური მცველის ძიებაშია, რადგან ჟერარ პიკე უკვე 33 წლისაა და კლუბს სოლიდური უკანახაზელი სჭირდება, რათა იგი ღირსეულად ჩაანაცვლოს.
თურქული გამოცემა NTVSpor-ის ინფორმაციით, კატალონიელები "ლესტერის" 24 წლის ფეხბურთელით, ჩაგლარ სოიონჯუთი ინტერესდებიან და მის დამატებას იმედოვნებენ.
წყაროს თანახმად, "ბარსა" დაცვის ხაზის გასაძლიერებლად საკმაოდ დიდი თანხის გაღებასაც არ მოერიდება და მზად არის, თურქი მოთამაშის სანაცვლოდ 40 მილიონი ევრო გადაიხადოს.
როგორც ცნობილია, ჩაგლარს ესპანეთში გადაბარგების პერსპექტივა ხიბლავს, თუმცა უცნობია, ბრენდან როჯერსის გუნდი მას ხსენებულ თანხად რამდენად დათმობს, რადგან ინგლისური კლუბის გეგმებში სოიონჯუს გაშვება არ შედის, მით უმეტეს, მისი შემცვლელის მოყვანის გარეშე.
მიუხედავად ამისა, ფინანსური კუთხით, "მელიებისთვის" თურქის გაყიდვა აგვისტოში უფრო ხელსაყრელი იქნება, ვიდრე მომდევნო სატრანსფერო ფანჯარაზე.
შესაძლოა, სოიონჯუ საყოველთაოდ ცნობილი ფეხბურთელი არაა, მაგრამ ფაქტია, რომ მან ევროპის ერთ-ერთ საუკეთესო ლიგაში შესაძლებლობები დაამტკიცა.
შეგახსენებთ, "ლურჯ-ბროწეულისფერები" სამუელ უმტიტის გაყიდვას აპირებენ (ფრანგის საწინააღმდეგო სურვილის მიუხედავად), ამის შედეგად გაჩენილი ნაპრალის შევსებას კი გონივრული ტრანსფერით აპირებენ. გარდა ამისა, მარკ-ანდრე ტერ შტეგენი საოცარი მეკარეა, თუმცა ძლიერი დაცვის გარეშე, ეს წარმატებისათვის არ კმარა.
24 წლის მცველმა მიმდინარე სეზონში, პრემიერ ლიგის ეგიდით, 34 მატჩში თავი 1 გოლითა და ამდენივე ასისტით გამოიჩინა. Transfermarkt-ი მას 40 მილიონ ევროდ აფასებს, ამჟამინდელ კლუბთან კონტრაქტი კი 2023 წლამდე აკავშირებს.
ამ სიახლეზე კომენტარები გათიშულია.
კომენტარები [ 16 ]