3 წელი ფეხბურთის ღალატიდან

დღეს 3 აგვისტოა. ნეიმარის "ბარსელონადან" "პარი სენ-ჟერმენში" გადასვლიდან ზუსტად 3 წელი გავიდა.

"3 წელი მას შემდეგ, რაც ნეიმარმა "ბარსელონას" უღალატა" - ასე ასათაურებს სტატიას კატალონიური Sport.

შეგვიძლია ვთქვათ, რომ ნეიმარმა, 3 წლის წინ, არა მხოლოდ "ბარსელონას", არამედ მთლიანად ფეხბურთს უღალატა - ამ ტრანსფერით მოგებული არავინ დარჩა, მათ შორის არც პსჟ, ფეხბურთმა კი ბევრი რამ იზარალა.

ნეიმარის წასვლამ დაშალა ფეხბურთის ისტორიაში თუ საუკეთესო არა, ერთ-ერთი საუკეთესო შემტევი ტრიო, რომელშიც, ბრაზილიელის გარდა, ლიონელ მესი და ლუის სუარესი შედიოდნენ. ბრაზილიელის "ღალატმა" სერიოზული დარტყმა მიაყენა "ბარსელონას" ამბიციებს. "პარი სენ-ჟერმენი" კი იგივე შედეგებს აჩვენებს, რასაც ნეიმარის გარეშეც აჩვენებდა - საფრანგეთში იგებს ყველაფერს, ან თითქმის ყველაფერი, ევროპაში კი - ვერაფერს. მოგებას ვინ ჩივის, პარიზელები, ნეიმართან ერთად, ჩემპიონთა ლიგის 1/4-ფინალში პირველად წელს გავიდნენ.

პსჟ-მ ნეიმარის ტრანსფერით სპორტულად ხომ ვერ იხეირა და პარიზელებს ეს ყველაფერი ძალიან დიდი თანხაც დაუჯდათ - 222 მილიონი "ბარსელონადან" გამოსყიდვა და ხელფასი წელიწადში 70 მილიონი. თუ ნეიმარი პსჟ-ში კონტრაქტის ამოწურვამდე დარჩა, გამოვა, რომ პარიზელებს მასში დაახლოებით 570 მილიონი ევრო ექნებათ გადახდილი. ამას ისიც ემატება, რომ "პარი სენ-ჟერმენს" ხელში ასეულობით მილიონიანი ჭირვეული ბავშვი შერჩა, რომელსაც თვალი გამუდმებით სხვა გუნდისგენ გაურბის.