ტოდიბო, ალენია, კოუტინიო... რა ბედი ელით "ბარსას" განათხოვრებულ მოთამაშეებს?
"ბარსელონას" შემადგენლობას ეკუთვნის 8 ფეხბურთელი, რომელმაც 2019/20 წლების სეზონი იჯარით სხვა კლუბებში გაატარა. კატალონიური რადიო RAC1-ის ცნობილი ჟურნალისტი ჟერარ რომერო ამ მოთამაშეების მომავალთან დაკავშირებით "ბარსას" გეგმებზე საუბრობს.
კარლეს ალენია: "ბეტისიდან" დაბრუნების შემდეგ 22 წლის ფეხბურთელი, დიდი ალბათობით, "ბარსელონას" აღარ დატოვებს.
ხუან მირანდა: ესპანელი მარცხენა მცველი, რომელიც ბოლოს "შალკეს" რიგებში გამოდიოდა, მომდევნო სეზონში თამაშის პრაქტიკას ლა ლიგის რომელიმე კლუბში მიიღებს.
რაფინია: "ბარსელონას" მისი შენარჩუნება აღარ სურს - ბრაზილიელი კლუბს საბოლოოდ დატოვებს. მოსალოდნელია, რომ მისი ტრანსფერი სერია ა-ში ან პრემიერ ლიგაში შედგება.
ორიოლ ბუსკეტსი: 21 წლის ნახევარმცველი, რომელმაც "ტვენტე" უკვე დატოვა, ერთი სეზონით პრიმერა დივიზიონის რომელიმე კლუბს შეუერთდება.
ჟან-კლერ ტოდიბო: მოსალოდნელია, რომ "ბარსელონა" ფრანგ ცენტრალურ მცველს აღარ დაიბრუნებს. მისი ტრანსფერის მსურველები ინგლისში უკვე გამოჩნდნენ.
მუსა ვაგე: ამ შემთხვევაშიც ტრანსფერი ივარაუდება. სენეგალელი მარჯვენა მცველი, დიდი ალბათობით, კარიერას საფრანგეთის ლიგა 1-ში გააგრძელებს.
ფილიპე კოუტინიო: "ბარსელონა" ბრაზილიელი ვარსკვლავის გაყიდვას არ აპირებს და "ბაიერნის" შემდეგ პრემიერ ლიგაში გაანათხოვრებს.
ემერსონი: ბრაზილიელი მცველი ჯერ "ბარსას" წევრი ოფიციალურად არაა და იმ შემთხვევაში, თუ კატალონიელები ტრანსფერს ან იჯარას მოისურვებენ, მის ამჟამინდელ კლუბს, "ბეტისს", 6 მილიონი ევრო უნდა გადაუხადონ.
ამ სიახლეზე კომენტარები გათიშულია.
კომენტარები [ 3 ]