LE PARISIEN: გრიზმანის აგენტი ბართომეუს შეხვდება
ანტუან გრიზმანი კვირის მთავარი თემა იქნება. მთელი საფეხბურთო სამყარო შოკირებულია იმით, თუ როგორ მოექცნენ ფრანგ მსოფლიო ჩემპიონს. სეტიენი მას საერთოდ აღარ ენდობა, არ აინტერესებს მასში გადახდილი 120 მილიონი და შემტევი ტრიოდან, მხოლოდ გრიზმანის როტაცია ხდება. განსაკუთრებით მას შემდეგ, რაც ლუის სუარესი მოედანს დაუბრუნდა.
კიკე სეტიენმა წინა შეხვედრაში, ტაქტიკაც შეცვალა, მაგრამ გრიზმანის ადგილი მაინც ვერ გამონახა, თამაშის მიწურულს 4-3-3-ს დაუბრუნდა, მაგრამ მოედანზე ფატი გამოიყვანა და არა გრიზმანი.
ანტუანი მთელი მეორე ტაიმის განმავლობაში ხურდებოდა, თამაშში კი 90-ე წუთზე ჩაერთო, ბურთს ექვსჯერ შეეხო, აქედან სამჯერ დაკარგა, ერთხელ კი კარგი თამაშით დაგვამახსოვრა თავი, ოღონდ დაცვაში. დიეგო სიმეონეს თვალწინ ლემერს ფეხებში ჩაუხტა და ბურთი აართვა, არგენტინელი მწვრთნელი ალბათ სიამაყით აღივსო, გრიზმანის დაცვითი უნარების განვითარება ხომ მისი დამსახურებაა?!
უკმაყოფილება ვერ დამალეს ანტუანის ძმამ და მამამ, რომელთაც ღიად გააკრიტიკეს სეტიენი. გრიზმანის და კი, ამავე დროს მისი აგენტიც არის და უახლოეს დღეებში ხელმძღვანელობასთან ისაუბრებს, მისი ძმის თაობაზე.
ფეხბურთელს დარჩენა სურს, ყოველ შემთხვევაში აქამდე ასე იყო და კატეგორიულად გამორიცხავდა, რომელიმე გარიგებაში მონაწილეობას, მათ შორის, ლაუტარო მარტინესის ტრანსფერში.
იგივე პოზიცია ჰქონდა კლუბს, "ბარსას" გრიზმანის შენარჩუნება სურს, მაგრამ ფრანგი იმაზე გაცილებით ცუდად გამოიყურება, ვიდრე კოუტინიო გამოიყურებოდა და საკითხავია, რამდენ ხანს ეყოფათ ხელმძღვანელებს მოთმინების უნარი.
ამ სიახლეზე კომენტარები გათიშულია.
კომენტარები [ 5 ]