დე იონგი "ბარსას" სამედიცინო შტაბს არ ენდობა
ერთ-ერთი კატალონიური წყაროს, TV3-ის, ცნობით, "ბარსელონას" ფეხბურთელები კლუბის სამედიცინო შტაბზე გაბრაზებულნი არიან და ამის ერთ-ერთ დასტურად დე იონგის შემთხვევასაც მიიჩნევენ.
მთავარი გუნდის რამდენიმე წევრს აქვს იმის ეჭვი, რომ ექიმები ზოგჯერ არასწორ დიაგნოზს სვამენ და ფეხბურთელებს შეუფერებელ სარეაბილიტაციო კურსს უნიშნავენ.
ფრენკი სამკურნალოდ ნიდერლანდებში წასვლას და სარეაბილიტაციო კურსის ნაკრების ექიმების მეთვალყურეობის ქვეშ გავლას აპირებს.
გავრცელებული ჭორების თანახმად, ის კატალონიელ ექიმებს კანჭის ტრავმაზე დასმული არასწორი დიაგნოზის შემდეგ აღარ ენდობა.
TV3-ის ინფორმაციით, ჰოლანდიელი ნახევარმცველი ერთადერთი ფეხბურთელი არაა, რომელიც ადგილობრივი ექიმების მიმართ უარყოფითადაა განწყობილი.
მაგალითად, უსმან დემბელე და სამუელ უმტიტი სამკურნალოდ საფრანგეთის ფეხბურთის ფედერაციის მეთვალყურეობით, ყატარში იყვნენ წასულები.
დე იონგმა ბოლო ტრავმა 13 ივნისს "მალიორკასთან" მატჩში მიიღო. მან მოედანი მცირე დისკომფორტის გამო დატოვა.
მიუხედავად იმისა, რომ მატჩის შემდგომ, პრესკონფერენციაზე კიკე სეტიენმა ნახევარმცველის ტრავმა არცთუ ისე სერიოზულ დაზიანებად მიიჩნია, მას 1 თვის გამოტოვება მაინც მოუწევს.
ამ სიახლეზე კომენტარები გათიშულია.
კომენტარები [ 8 ]