MD: "ბარსელონამ" კოუტინიოს იჯარის ახალი პირობები ჩამოაყალიბა
"ბარსელონას" მიზანი მომდევნო სატრანსფერო ფანჯრის დროს კლუბის ბრაზილიელი ნახევარმცველის, ფილიპე კოუტინიოს, გაყიდვა იქნება. თუმცა გეგმა B-ს მისი იჯარის წესით კიდევ ერთხელ გაშვება წარმოადგენს, იტყობინება Mundo Deportivo.
პრესაში გავრცელებული ინფორმაციის თანახმად, ფეხბურთელის მიმართ ინტერესს პრემიერ ლიგის რამდენიმე კლუბი ამჟღავნებს, რომლებთანაც კოუტინიოს აგენტი, კია ჯორაბჩიანი, მოლაპარაკებებს აწარმოებს.
"ბლაუგრანას" პრიორიტეტი ტრანსფერისგან 80 მილიონი ევროს მიღებაა, მაგრამ, კლუბის ხელმძღვანელობას ესმის, რომ შექმნილი ვითარებიდან გამომდინარე, ეს რთული იქნება. ამიტომაც, სათადარიგო ვარიანტს მისი კიდევ ერთხელ განათხოვრება წარმოადგენს.
კატალონიური გამოცემის მტკიცებით, "ბარსა" მისი იჯარის სანაცვლოდ 10 მილიონ ევროს მოითხოვს, იმაზე მეტს, ვიდრე "ბაიერნმა" გადაიხადა (8.5 მილიონი). მსგავსად "რეკორდმაისტერთან" დადებული გარიგებისა, ფეხბურთელის ხელფასზე პასუხისმგებლობა ახალ კლუბს დაეკისრება.
მიუნხენის "ბაიერნმა" უკვე ოფიციალურად დაადასტურა, რომ კოუტინიოს გამოსყიდვის უფლებას არ გამოიყენებს.
ამ სიახლეზე კომენტარები გათიშულია.
კომენტარები [ 11 ]