"იუვენტუსს" ფრენკი დე იონგი მოუნდა
RMC Sport-ის ცნობით, "იუვენტუსმა" მირალემ პიანიჩის სანაცვლოდ "ბარსელონას" ნახევარმცველი ფრენკი დე იონგი მოითხოვა.
ბოლო დროს გავრცელებული ინფორმაციით, "ბარსელონას" ტურინელთა 30 წლის ბოსნიელი ნახევარმცველის შეძენა სურს. ბევრი იწერებოდა არტურისა და პიანიჩის ბარტერზე, თუმცა ჭორებს ბოლო მოუღო თავად ბრაზილიელმა ნახევარმცველმა, რომელმაც კატალონიური გუნდის დატოვება გამორიცხა.
ვრცელდება ცნობები, რომ კლუბები, არტურის უარის გამო, ალტერნატიულ ვარიანტებს ეძებენ და ფრენკი დე იონგის სახელმაც გაიჟღერა.
ფრანგული წყაროს ინფორმაციით, იტალიელებმა პიანიჩის ტრანსფერში ჰოლანდიელი შუახაზელის ჩართვა მოისურვეს. 23 წლის ფეხბურთელი "იუვეში" მის ყოფილ თანაგუნდელს, მატიას დე ლიხტს შეუერთდებოდა, თუმცა დე იონგის "ბარსელონადან" წასვლა თითქმის გამორიცხულია.
"ბლაუგრანამ" ფრენკი დე იონგი გასულ ზაფხულში "აიაქსიდან" 75 მილიონ ევროდ დაიმატა და ნაკლებად სავარაუდოა, რომ კატალონიელები ნიდერლანდელ ტალანტს ასე მალე შეელიონ.
ამ სიახლეზე კომენტარები გათიშულია.
კომენტარები [ 19 ]