ჟორდი ალბა - ლა ლიგის საუკეთესო ასისტენტი მცველი

სპორტული სტატისტიკის მწარმოებელმა კომპანია Opta-მ "ბარსელონას" უკანახაზელი ჟორდი ალბა ესპანეთის ჩემპიონატის საუკეთესო ასისტენტ მცველად დაასახელა.

წყაროს ცნობით, ალბა ლა ლიგაში, სულ მცირე ბოლო 4 სეზონის განმავლობაში, მცველებს შორის ყველაზე მეტ საგოლე პასს აკეთებს. ესპანეთის ჩემპიონატში, 2015/16 წლების სეზონის შემდეგ, ჟორდის მიერ შესრულებულ 29 ასისტზე მეტი შედეგიანი გადაცემა სხვა არცერთ უკანახაზელს არ გაუკეთებია.

ჟორდი ალბა "ბარსელონას" აღზრდილია. ის "ლა მასიაში" 1998-2005 წლებში ირიცხებოდა. ალბა კატალონიურ კლუბში 2012 წელს "ვალენსიადან" 14 მილიონი ევროს სანაცვლოდ დაბრუნდა.

31 წლის ფეხბურთელის ანგარიშზე, მიმდინარე სეზონში, 24 მატჩი, 1 გოლი და 2 შედეგიანი გადაცემაა. ალბამ, მთლიანობაში, "ბლაუგრანაში" 324 თამაში ჩაატარა, 16 ბურთი გაიტანა და 59 საგოლე გადაცემა გააკეთა.