ჟოან ლაპორტა საპრეზიდენტო არჩევნებში მონაწილეობას აპირებს
"ბარსელონას" ყოფილი პრეზიდენტი ჟოან ლაპორტა აპირებს კლუბის პირველი პირის სტატუსი უკვე მიმდინარე წელს დაიბრუნოს. ამ ინფორმაციას Cadena SER ავრცელებს.
გავრცელებული ინფორმაციით, მომდევნო კვირაში გაირკვევა, გადადგება თუ არა თანამდებობიდან ჟოზეპ მარია ბართომეუ და დაინიშნება თუ არა ვადამდელი საპრეზიდენტო არჩევნები.
ესპანელი ჟურნალისტების ცნობით, მოვლენების ამგვარად განვითარების შემთხვევაში, ლაპორტა შეეცდება კლუბის პრეზიდენტობა დაიბრუნოს. Cadena SER-ის ცნობით, ლაპორტა პრეზიდენტობის კიდევ ერთ კანდიდატთან, ვიქტორ ფონტთან მოლაპარაკებებს აწარმოებს, მაგრამ პრობლემა ისაა, რომ ორივე მათგანს პრეზიდენტობის ამბიცია აქვს და მათი ხედვებიც ერთმანეთს ბოლომდე არ ემთხვევა. აქედან გამომდინარე, ძნელი წარმოსადგენია, ლაპორტა და ფონტი არჩევნებზე ერთი კანდიდატურით წარდგნენ.
დღეის მდგომარეობით, ივარაუდება, რომ თუ წელს არჩევნები გაიმართა, მასში მონაწილეობას მიიღებენ: ემილი რუსო (ამჟამინდელი ბორდის კანდიდატი), ვიქტორ ფონტი, ჟოან ლაპორტა.
ჟოან ლაპორტა "ბარსელონას" პრეზიდენტი 2003-2010 წლებში იყო. სწორედ მის სახელს უკავშირდება გუნდში ფრანკ რაიკარდის, რონალდინიოს, სამუელ ეტო'ოს, პეპ გვარდიოლას (მწვრთნელის) მიყვანა, გუნდის კრიზისიდან 2-ჯერ გამოყვანა და კლუბის ისტორიაში პირველი ტრებლის (2008/09) მოგება.
ამ სიახლეზე კომენტარები გათიშულია.
კომენტარები [ 9 ]