ზამთრის სატრანსფერო ფანჯრის მიმოხილვა
"ბარსელონა", ზამთრის სატრანსფერო ფანჯრის დროს, უჩვეულოდ აქტიური იყო, მაგრამ იანვარში კატალონიელთა პირველი გუნდი არათუ ვერ გაძლიერდა, დასუსტდა კიდეც.
გასულ თვეში, "ბარსას" პირველი და სარეზერვო გუნდები 8 ფეხბურთლმა დატოვა. კატალონიელებმა 4 მოთამაშე შეიძინეს, რომელთაგანაც 2 გუნდს მომდევნო სეზონიდან შეუერთდება.
მოვიდნენ
ფრანსიშკუ ტრინკაუ
ახალგაზრდა პორტუგალიელი შემტევის ტრანსფერი გუშინ დადასტურდა. ის გუნდს 1 ივლისს შეუერთდება.
მატეუს ფერნანდესი
კიდევ ერთი ახალგაზრდა, რომლის ტრანსფერიც გუშინ დადასტურდა და რომელიც კატალონიელებს ასევე 1 ივლისს შეუერთდება.
მატეუს პერეირა
21 წლის ნახევარმცველი, რომელმაც "იუვენტუსში" თავი ვერაფრით გამოიჩინა, "ბარსა ბ"-ში იჯარით ითამაშებს.
რეი მანაი
ალბანელი ფეხბურთელი "ბარსელონა ბ"-ს "ალბასეტედან" შეუერთდა.
წავიდნენ
კარლეს ალენია
პირველი ფეხბურთელი, რომელმაც 2020 წლის ზამთრის სატრანსფერო ფანჯრის დროს პირველი გუნდი დატოვა. ახალგაზრდა ფეხბურთელი "ბეტისში" იჯარით ითამაშებს და ის "ბარსას" ზაფხულში დაუბრუნდება.
ჟან-კლერ ტოდიბო
პირველი გუნდის მორიგი წევრი, რომელმაც სათამაშო დროის მიღების მიზნით, "ბარსა" იჯარით დატოვა. ახალგაზრდა ფრანგი "შალკეში" იჯარით ითამაშებს, სეზონის ბოლოს კი გერმანელებს მისი 25 მილიონად გამოსყიდვის უფლება ექნებათ.
მუსა ვაგე
კიდევ ერთი უკანახაზელი, რომელსაც სათამაშო პრაქტიკა აკლდა. ახალგაზრდა სენეგალელი მარჯვენა მცველი "ნიცაში" იჯარით ითამაშებს, სეზონის ბოლოს კი ფრანგებს მისი 10 მილიონ ევროდ გამოსყიდვის უფლება ექნებათ.
კარლეს პერესი
ახალგაზრდა შემტევი გუნდის ახალ მწვრთნელს, კიკე სეტიენს არ მოსწონდა, რის გამოც მას გუნდიდან წასვლა მოუხდა. კარლეს პერესი "რომაში" იჯარით გადავიდა, სეზონის ბოლოს კი რომაელებს მისი 11 მილიონ ევროდ გამოსყიდვის ვალდებულება აქვთ.
ალეხანდრო მარკესი
"ბარსა ბ"-ს თავდამსხმელი "იუვენტუსში" 8.2 მილიონ ევროს სანაცვლოდ გადავიდა. გავრცელებული ინფორმაციით, მარკესის გაშვების მიზეზი ისაა, რომ ის "ბარსელონას" სტილის მოთამაშე არ იყო.
აბელ რუისი
იმავე მიზეზით დატოვა "ბარსა ბ" აბელ რუისმაც, რომელიც "ბრაგაში" ჯერ იჯარით ითმაშებს, სეზონის ბოლოს კი პორტუგალიელები მას 10 მილიონად გამოისყიდიან.
მიკე ვან ბეინენი
ჰოლანდიელი მარჯვენა მცველი "ბარსელონაში" მხოლოდ იმის გამო მოხვდა, რომ ის ფრენკი დე იონგის აგენტის შვილია. "ბარსა ბ"-ში მას ერთი თამაშიც არ ჩაუტარებია. კატალონიელებმა ფეხბურთელთან კონტრაქტი გაწყვიტეს და ის თურქულ "გენჩლერბირლიგიში" გადავიდა.
ლუი ბარი
16 წლის ინგლისელმა თავდამსხმელმა, რომელსაც დიდ იმედებს უკავშირებდნენ, მოლოდინები ვერ გაამართლა და ის "ასტონ ვილაში" 1 მილიონ ევროდ გადავიდა.
ამ სიახლეზე კომენტარები გათიშულია.
კომენტარები [ 13 ]